Fuiloro – Komunidade Morano Larimaca, Fuiluro, selebra hamutuk festa Madre Mazzrello iha loron ninia moris nian, 9 Maiu. Konvidadu sira ba festa ida ne’e, mai husi komunidade SDB- Lospalos, komunidade SDB- Fuiloro ho menino kolejiu sira, animadores, antiga aluna balun, hamutuk ho menina Kolejiu no Madre sira. Konvidadu sira ne’ebé prezente hamutuk 280 pessoa, programa ba Festa ida ne’e, uluknanain hahu ho selebrasaun Eukarístika, ne’ebé selebra husi Padre Transfigurasaun SDB, no ko-selebrante sira mak Pe. Carlos SDB, Pe. David SDB no diacono Venancio SDB, misa hahu tuku 06.30 iha kapela salesiano sira nian.

Mensajen interesante ne’ebé Padre Carlos hato’o iha ninia omilia mak fahe kona MM, nia surat ba Irman sira no MM nia virtude sira. Virtude ne’ebé MM iha mak liu-liu vertude haraik-an no ksolok, nia hatutan tan ninia omilia hodi dehan katak; “ wainhira ha’u haree Madre Mazzarello nia imajen, ha’u bele dehan Madre Mazzarello nia oin buis hela deit, maibé wainhira ha’u lee ninia istoria no surat sira, ha’u bele dehan katak Madre Mazzarello mak ema ida ne’ebé ksolok nian, ksolok ne’ebé madre iha mak ksolok klean husi laran, iha ninia surat sira kuaze nia husu ba nia irman sira, uluknanain mak kona ba ksolok. Entaun ho liafuan ksolok ne’e , hodi interpreta tuir sabedoria MM nia dehan katak, ksolok ida ne’e nia hun mak haraik-an, simplisidade, domin, amizade ne’ebé lori ema seluk ba Maromak.

Aleinde ida ne’e, Padre hatutan tan katak Madre Mazzarello mak ema moris nafatin iha Maromak nia prezensa, momentu ba momentu nia buka atu rekoñese nafatin Maromak nia prezensa, hanesan ita haree no lee iha nia livru manan nafatin: maske nia uma dook husi kreda, maibe liu husi ninia janela   nia buka atu reza no kontempla nafatin Maromak, minutu 15 nia laran nia haluha Maromak, nia halai ba buka kedas Padre atu konfesa, keta karik nia sala, wainhira lahanoin kona ba Maromak. Iha Padre nia omilia ida ne’e nia koalia kuaze oras 1, depois missa remata, iha mos beijos ba relikia Madre Mazzarello nian.

Ami nia programa seidauk remata iha ne’e, iha lokraik 05.30 to’o remata, iha tan atividades seluk ne’ebé organiza husi Madre sira, mak hanesan, halo espozisaun kona ba koñesementu Madre Mazzarello, Jog buka mensajen no jogus seluk tan. Depoizde atividade ida ne’e iha mos jantar hamutuk no ikus liu taka ho koviviu no boanoite husi Madre diretora, Me.Sebastiana, FMA.

(Maria Sarmento)