Venilale – Domin no ksolok ba ita nia Co-fundadora. Nune’e Ohin, 09/05/2017 komunidade Maria Auxiliadora – Venilale hamutuk ho labarik orfan sira selebra festa S. Maria Domingas Mazzarello nian. Antes ami selebra festa ne’e, iha mós  meios oioin  ne’ebé tulun ami mak hanesan; sharing Madre mazzarello nia karta, ami hotu sente haksolok tanba sente hanesan inan ida ne’ebé moris, preokupa ba nia oan sira nia moris. Liu-liu fó hanoin ba ita, Buka halo di’ak barak wainira ita sei iha tempu no lalika neon betek ba difikuldade sira ne’ebé ita hasoru. Dehan nafatin: Jezús tenki sai ita nia kbiit tomak. Iha loro-kraik ami reza tersu hamutuk ho labarik orfan sira iha komunidade.

Misa ami halo iha Parókia, loraik oras tuku 6:00. Pe. João Gaspar mak selebra. Iha omilia Padre dehan; “Atu kompleta misaun ne’ebé Na’i Maromak husik hela, misaun salvasaun ne’ebé Nia Oan doben Jezús Kristu hahu ona,  Maromak bele de’it, koalia de’it ou Maromak bele de’it halo milagre dala ida de’it, Nia bele manan fali kedas ema barak ne’ebé dook husi Nia. Nia la presiza ita ema nia tulun, Nia la presiza ita ema nia sakrifisiu sé Maromak hakarak. (lo’os ka lae? Buat hotu Nia mak halo ne’ebé Nia bele de’it ho Nia liafuan buat hotu sai tuir Nia hakarak inklui salvasaun ba ita ema). Maibé lae! Maromak nia salvasaun to’o mai ohin loron maluk sarani sira Na’i Maromak nunka halo hanesan ne’e. Nia nunka halo intervensaun direita ba misaun ruma ne’ebé nia oan doben Jezús husik hela.  Nunka.

Maibé Nia hili ema atu kolabora ho Nia. Nia hili ema oioin: ho kualidade ne’ebé la hanesan, ho ida-ida nia istória passado no estilu ne’ebé la hanesan, maibé ho misaun ida de’it. Fó hatene ba povo Israel foun kona-ba Maromak Nia domin, Maromak Nia di’ak, Maromak Nia laran sadia, no ema barak ne’ebé Nia hili, hili husi povo sira nia le’et, hili husi ema babain hanesan imi ho ha’u, hili ema maksalak sira, hili ema ho temperamentu no ho karakterístika oioin. Balun riku, balun kiak, balun matan delek, balun tilun diuk no seluk-seluk tan.

Ema hirak ne’e Na’i Maromak hili atu bele hetan susesu iha misaun ne’ebé Maromak fó, Maromak hakarak sira hatais iha sira nia-an virtude oioin ne’ebé bele tulun sira manan klamar ba Maromak. Virtude sira hanesan: haraik-an, fuan ne’ebé nakonu ho karidade, simplisidade no virtude seluk-seluktan. Na’i Maromak mós husu ba sira atu bele susesu iha misaun, sira tenki tau konfiansa boot ba ema ida de’it, Nia mak Na’i Jezús Kristu. Kristu tenki sai sira nia biru, sira nia forsa, sira nia maluk, sira nia fatin hodi halerik kona-ba susar no ksolok hotu iha sira nia misaun, Kristu tenki sai buat hotu ba sira durante hala’o sira nia misaun.

Husi ema barak ne’ebé Maromak hili ba misaun salvasaun nian, entre sira, ida mak ohin ita selebra ninia festa: Sta. Maria Domingas Mazzarello. Santa ida ne’e kontempla momoos kona-ba buat ne’ebé Maromak husu ba Nia emar sira ba misaun santu. Haraik-an, ativa no sakrifikada. Nia mós figura ida ne’ebé hadomi simplisidade iha moris no servisu maka’as. Ho virtude hirak ne’e halo nia sai oinseluk tanba fiar metin iha Jezús no Jezús mak  sai nia forsa. Nune’e ho ninia moris nia muda ema barak nia moris (husi nakukun ba naroman), ninia moris transforma ema barak nia moris, liu-liu feto-raan sira. Ninia moris mós kontribui ba transformasaun sosiedade nian. Maibé, vitoria boot ne’ebé nia iha mak liu husi ninia moris, nia manan klamar barak ba Maromak. Maromak ohin, kontínua fihir ema sira atu kontínua Nia misaun santu ne’e no ohin ita selebra S. Maria Domingas Mazzarello nia festa, Kreda konvida ita atu imita nia moris, nia virtude atu bele manan klamar barak liutan ba Maromak”.

Boas festas ba ita hotu. Viva Santa Maria Mazzarello! … harohan mai ami.

(Agata Freitas)