RV/Redasaun – Iha audiénsia molok Regina Caeli , Papa Francisco komenta kona-ba pájina Evanjellu Domingu Bibi-Atan Di’ak nian, hodi aprezenta ilas rua ne’ebé kompleta malu: “bibi-atan no odamatan bibi-luhan nian.

Ema barak hakbesik ba bibi-luhan: balun tama husi odamatan no balun tama husi fatin seluk, Amu-Papa hateten no esplika: “ida uluk mak bibi-atan, daruak ne’e ema leet ne’ebé la hadomi bibi sira, hakarak tama ho interese seluk.

“Jezús identifika an ho ida uluk no manifesta relasaun familiaridade nian ho bibi sira, espresa liuhusi lian, hodi bolu sira no sira rekoñese nia no tuir nia. Nia bolu sira atu lori ba li’ur, ba du’ut matak iha-ne’ebé sira hetan ai-han di’ak”.

Ilas daruak ne’ebé Jezús uza atu aprezenta mak “odamatan” bibi sira-nian. Kristu, Bibi-Atan Di’ak, sai odamatan salvasaun ba umanidade tanba oferese moris ba nia bibi sira.

“Jezús, bibi-atan di’ak no odamatan bibi sira-nian, mak ulun ne’ebé ninia autoridade esprime iha servisu, ulun ne’ebé atu komanda nia fó moris no la husu ba sira seluk atu sakrifika an. Ho ulun ida hanesan ne’e ita bele konfia, hanesan bibi sira ne’ebé rona nia bibi-atan nia lian tanba hatene katak ho nia sira bá iha du’ut di’ak no wain”, Papa Francisco destaka.

“Natón de’it sinál ida, bolun ida no sira tuir nia, obedese nia, la’o hodi tuir nia lian ne’ebé sira sente nu’udar prezensa belun nian, forte no midar no tempu hanesan, hatudu dalan, proteje, konsola no bali. Nun’e mak Kristu halo mai ita”, Amu-Papa subliña:

Iha dimensaun ida esperiénsia sarani nian ne’ebé karik ita husik tiha iha lalatak: dimensaun espirituál no afetiva. Sente sai ida de’it liuhusi talin espesiál ida ho Na’i hanesan bibi sira ba nia bibi-atan. Dalaruma ita rasionaliza demais fiar no ita monu iha risku atu lakon persesaun kona-ba ninia lian, Jezús bibi-atan di’ak nia lian, ne’ebé estimula no faxina.”

Esperiénsia furak atu sente Jezús hadomi ita. Imi husu ba an rasik: Ha’u sente Jezús hadomi ha’u?” Ba nia ita la’ós ema leet, maibé belun no maun-alin sira. Maski nune’e, la fasil atu distinge bibi-atan di’ak nia lian. “Iha nafatin perigu na’ok-teen nian, ahu-na’in nian no bibi-atan falsu nian. Iha sempre risku atu sai distraidu ho lian barak ne’ebé nalian”, Amu-Papa hatutan.

Hafoin, Papa Francisco fó hanoin kona-ba orasaun ba vokasaun amlulik no relijioza no kona-ba amlulik foun ne’ebé nia ordena iha domingu Bibi-Atan Di’ak nian:

“Iha Loron Mundiál Orasaun ba Vokasaun sira – ho modu partikulár ba vokasaun amlulik nian, atu Na’i haruka bibi-atan di’ak – ita invoka Virjen Maria: nia akompaña amlulik foun na’in sanulu ne’ebé ha’u foin ordena. Ha’u husu ba sira na’in haat husi Dioseze Roma nian atu mai fó bensan hamutuk ho ha’u. Na’i-Feto tahan ho nia tulun sira ne’ebé simu bolun husi Jezús Kristu, atu prontu no laran-luak atu tuir nia lian.”

Molok despede husi audiénsia, depoizde orasaun mariana Amu-Papa fó hanoin kona-ba ninia peregrinasaun ba Fátima, Portugal, sesta no sábadu oin (loron 12 no 13 Maiu), iha okaziaun tinan 100 Na’i-Feto nia aparisaun dahuluk ba bibi-atan ki’ik-oan na’in tolu iha Cova da Iria:

Iha fulan ne’e ita reza Tersu ho modu partikulár ba dame, hanesan Virjen iha Fátima husu, iha-ne’ebé ha’u sei bá iha peregrinasaun iha loron ruma nia laran, iha okaziaun aparisaun dahuluk.