Baucau – Loron 30, loron ikus ba fulan Abríl nian, oratóriu Teulale, Diwake no grupu Infánsia Misionária halo jogu amizade ho oratóriu sira husi Laga Sentru no Laga Samalari ne’ebé akompaña husi Ir. Ivónia Sequeira FMA. Objetivu husi soru-mutu ne’e mak atu selebra festa Paskua no festa Madre Jerál nian hamutuk nu’udar oratorianu. Festa ne’e realiza iha Teulale- Baucau.

Festa ne’e hahú iha tuku 11 dader ho dansa benvinda nian husi oratóriu Teulale no OPIAM sira ba oratóriu Laga. Depoizde ida ne’e kontinua ho han meudia ne’ebé idak-idak prepara. Iha tuku 13:30 halibur hamutuk fali hodi rona liafuan ruma husi Ir.Sanzinha De Jesus, molok hahú jogu. Iha ne’e Ir. Sanzinha hateten katak: “nu’udar oratorianu halibur hamutuk halo festa sira mak sinál diak basá bele koñese kolega sira husi fatin seluk no habelar ita nia amizade ba malu. Tema ba festa Madre Jerál nian “Fuan Oratorianu” signifika imi oratorianu sira iha mundu tomak iha madre FMA sira nia fuan liu husi sira nia sakrífisiu no dedikasaun tomak ba imi atu bele koñese liután Jezús Kristu”.

Hafoin kontinua ho jogu sira hanesan: Basket mane animadores, basket feto iha grupu 2, tebe bola feto grupu ida no tebe bola mane grupu ida. Ikus mai, basket mane husi Laga hamutuk ho tebe bola mane husi Laga mak sai manan na’in. Nune’e mós basket feto animadoras no basket feto Laura husi Baucau mak sai manán na’in. Tebe bola feto husi Laga no Baucau hanesan.

Depoizde jogu halo orasaun hamutuk kontinua ho merenda no hasai foto hamutuk. Hafaoin fahe malu. Oratorianu hamutuk 250 hotu- hotu kontente no haksolok liu husi jogu sira ne’ebé halo.

(Alice Gama)