Hamutuk ho Kreda tomak no Santu Padre nu’udar nia ulun mai ita sasin ita-nia Fiar hodi adora, kontempla, agradese Na’i Jezús Kristu iha Sakramentu  nia futar Isin no Raan, hodi mós hasa’e ita-nia nesesidade hotu.

 

Ita iha ona Tinan Fiar nia dalan klaran. Tinan fiar nian mak tempu grasa nian atu hafoun, hakle’an, haburas, hametin no hamanas ita-nia fiar ba Na’i Jezús Kristu iha tempu ohin loron nian, nune’e ita sarani sira, iha fadiga loroloron nian, la para atu saran sira-nia moris, ho konviksaun no korajen, ba Nai Jezús Kristu.  Ita husu se iha tempu ne’e ita-nia Kreda lokál, ita-nia komunidade sira, ita-nia uma-laran sira halo duni dalan ne’e eh lae? Se karik ita seidauk, ita keta baruk, ita hadeer bá.

 

Iha biban ida-ne’e, ami fahe fali programa Tinan Fiar nian iha nivel Kreda Universál hahú husi Domingu aban, Solenidade Corpus Domini, ne’ebé loloos iha ita-nia rain selebra tiha ona iha kinta foin daudaun.

Tuir programa nivel Kreda universál, aban Domingu, 2 Juñu, iha tuku 5 loraik oras Roma, iha Timor-Leste tuku 00.00 (loron 3 Juñu nian) ita sei iha adorasaun eukarístika solene ne’ebé sei halo ho modu simultáneu iha mundu tomak. Iha katedrál sira dioseze ida-idak nian no iha kreda hotu, sei posivel atu iha oras hanesan, ema halo esperiénsia silénsiu kontemplasaun nian nu’udar sasin fiar nian neebé kontempla Maromak nia mistériu moris no horik iha ita leet ho nia Isin no Raan.

Iha website www.annusfidei.va ita bele hetan informasaun kona-ba momentu ne’e no dioseze sira ne’ebé adere ba atividade ida-ne’e, liu dioseze 350 (ita-nia dioseze tolu iha Timor la adere), la sura komunidade relijioza kontemplativa no vida ativa ne’ebé, iha silénsiu sei partisipa ba eventu renovasaun fiar iha Kristu nia prezensa reál iha Santíssimo Sakramentu.

 

Ba atividade nivel universál seluk ne’ebé programa ona mak tuir mai ne’e:

 

• Domigu 6 juñu, sei dedika ba sasin Evanjellu moris nian, ne’ebé sempre haree Kreda nu’udar promotór defensór ema nia dignidade husi momentu dahuluk moris nian to’o momentu naturál ikus moris nian.
• Domingu 7 Jullu, sei iha konkluzaun peregrinasaun nian ne’ebé seminarista sira, novísiu sira, no sira ne’ebé hili dalan vokasionál halo. Sira sei hatudu ba públiku ksolok atu tuir Nai iha servisu Kreda nian.
• Husi Jullu 23 to’o 28, Jornada Mundiál Juventude nian iha Rio de Janeiro sei sai, hanesan baibain, dalan ida nia tutun ne’ebé sei hatudu foin-sa’e sira husi mundu tomak  iha enkontru haksolok nian atu hateten ba ema hotu fiar nia importánsia.
• Loron 29 Setembru sei dedika ho modu partikulár ba katekista sira, atu halo klaru katekeze nia importánsia iha fiar nia baburas no komprensaun intelijente no sistemátika fiar nian liga ho moris pesoál no komuidade nia baburas. Ida-ne’e sei sai oportunidade ida atu hanoin kona-ba aniversáriu da-20 publiksaun Katesizmu Kreda Katólika nian.
• Domingu 13 Outubru sei haree prezensa realidade mariana sira hotu nian atu hatudu oinsá Maria Virjen, Maromak nia Inan, íkone ida fiar nian ba fiar-na’in hotu. Hodi ninia  konfiansa no obediénsia ba Aman nia hakaran bele kumpre kmanek oioin.
• Iha Domingu 24 Novembru, finalmente, sei selebra loron ikus Tinan Fiar nian.