Sidade Vaticano – Iha Rozáriu horisehik, 31 Maiu, atu taka fulan marianu,  Papa Francisco molok fó bensan finál, halo reflesaun kona-ba Maria ne’ebé hatene rona, deside no atua , liafuan tolu ne’ebé sintetiza Maria nia atitude sira no sai mós dalan mai ita bainhira hasoru buat ne’ebé Na’i husu.

Maria nia atitude rona nian ne’ebé “la’ós rona ida superfisiál. Maibé rona ho atensaun, akollimentu, disponibilidade ba Maromak”.

Nune’e, ezame konxiénsia nian ba ita hotu: “rona Maromak ne’ebé ko’alia mai ita, no rona mós realidade loroloron nian, atensaun ba ema sira, ba faktu sira basá Na’i iha ita-ni amoris nia odamatan no tuku nia ho modu wain, tau sinál iha ita-nia dalan; na ita, kapasidade atu hare sira.”

Na’i-Feto nia desizaun la’ós ansi nian, “la moris ho ansi”, maibé bainhira presiza nia “ba lalais”.  Maria la husik atu eventu sira rasta nia, nia la evita difkuldade desizaun nian. Nune’e, Amu-Papa dehan iha Festa Kaben nian iha Kaná be;e haree “umanidade, Maria nia konkretude, katak matan moris ba faktu sira, ba problema sira”.

Ne’e mak hanorin ba ohin: “Iha vida difisil foti desizaun sira, dalabarak ita iha tendénsia atu dada, atu husik ema seluk mak deside iha ita-nia fatin, dalaruma ita prefere husik eventu sira rasta ita, tuir moda momentu nian; dalaruma, ita hatene buat ne’ebé ita  tenke halo, maibé ita la iha aten-barani ka ita sente difisil liu tanba signifika ba kontra korrente”.

Ikusnian, Maria rona, deside no atua, “bá lalais”. Maski “iha orasaun, iha Maromak nia oin ne’ebé ko’alia, Maria la iha ansi, la husik momentu kontrola nia, la husik eventu sira rasta nia. Maibé bainhira nia hatene momoos sá mak Maromak husu ba nia, buat ne’ebé nia tenke halo, nia la hein, la demora, maibé bá lalais”.

Obediénsia no karidade tanba Maira “bá to’o Izabél atu sai util; no iha ninia sai husi uma, husi an rasik, tanba domin, nia lori buat ne’ebé nis soi nu’udar presiozu liu: Jezús, nia lori nia Oan”.

Amu-Papa nia apelu dala ida tan ba sarani sira ohin nian, ne’ebé karik rona, hatene sá mak atu deside, maibé la hala’o. “Liuliu – Amu-Papa hateten – la tau iha risku ita-nia moris rasik hodi book an lalais bá hasoru ema seluk atu lori ita-nia tulun, ita-nia komprensaun, ita-nia karidade, atu ita mós lori, hanesan Maria, buat ne’ebé ita soi presiozu liu no ita simu, Jezús no ninia Evanjellu, ho liafuan no liuliu ho sasin konkretu ita-nia hahalok nain”.

Papa Francisco taka nia meditasaun ho orasaun ida:

“Maria, feto raronak nian, halo ami nia tilun nakloke; halo atu ami hatene rona ita-nia Oan Jezús nia Liafuan iha liafuan rihun-rihun mundu nian nia leet; halo ami hatene rona realidade ami moris bá, ema ida-idak ami hasoru, liuliu ida-ne’ebé kaik, iha nesesidade, iha difikuldade.

Maria, feto desizaun nian, leno ami-nia neon no ami-nia fuan, atu ami hatene obedese ita-nia Oan Jezús nia Liafuan, lahó ezitasaun; haraik mai ami aten-barani desizaun nian, atu ami keta dada an nune’e ema seluk orienta ami nia moris.

Maria, feto hahalok nian, halo atu ami-nia liamn no ami-nia ain sira book an “lalais”hasoru ema seluk, atu lori ita-nia Ona Jezús nia karidade no domin, atu lori, hanesan ó, iha mundu roman Evanjellu nian. Amen.”

Hotu tiha bensan Amu-Papa hateten: Atu Maria halo ita sai maun no biin alin liután! Hafoin nia agradese ba prezensa.