Sidade Vaticano – Iha katekeze kuarta, 29, Papa Francisco hahú siklu foun ensinamentu nian. Amu-Papa, hahú reflesaun kona-ba mistériu Kreda nian, hodi esplora espresaun ruma husi testu Konsíliu Vaticano II, hahú husi ida ne’ebé ko’alia kona-ba Kreda nu’udar Maromak nia família.

Durante audiénsia jerál, Francisco  temi filafali Papa eméritu Bento XVI, hodi hanoin ninia afirmasaun katak Kreda mak obra Maromak nian, moris husi nia planu domin nian no konkretiza ho modu progresivu iha istória. “Kreda moris husi Maromak nia hakaran atu bolu ema hotu ba komuñaun ho Nia, ba ninia amizade no partisipa nu’udar oan sira iha nia vida divina”, Amu-Papa hatutan.

[Asesu kópia ho lia-portugés]

 

Santu Padre mós kritika sira ne’ebé dehan katak fiar iha Kristu, maibé la fiar iha Kreda, nune’e mós, sira ne’ebé afirma: “ha’u fiar iha Maromak, maibé lae iha amlulik sira”. Tuir Papa Francisco, Kreda mak lori Kristu ba ema sira no mós ba Maromak, “Kreda mak família boot Maromak nia oan sira-nian”.

Maski nune’e, Amu-Papa mós rekoñese aspetu umanu Instituisaun nian,  ne’ebé hatudu momoos iha sira ne’ebé hola parte – amlulik no  sarani sira. “iha defeitu sira, imperfeisaun sira, salan sira no Papa mós iha no iha barak, maibé buat ne’ebé furak mak, bainhira ita haree katak ita ema maksalak, ita hetan Maromak nia laran-sadia, ne’ebé perdua nafatin. Keta haluha: Maromak nafatin perdua no simu ita iha nia domin no laran-sadia”.

 

Hodi enfatiza tema sentrál audiénsia nian, Papa destaka katak Kreda mak família ida iha ne’ebé ema fó domin no simu domin, Maromak nia domin mak fó moris ba no fó ukun-fuan atu hadomi ema seluk lahó distinsaun.

Papa Francisco husu mós se katóliku sira iha domin ba Kreda no oinsá sira tau matan ba Instituisaun ne’e ne’ebé, obra ida innspirasuan Maormak nian, moris husi Maromak nia fuan.

“Ohin ita husu ba an rasik: ha’u nia domin ba Kreda boot oinsá? Ha’u harohan ba nia? Ha’u sente ha’u parte família Kreda nian? Said amak ha’u halo atu nia sai komunidade ida iha ne’ebé ema hotu sente ema simu nia no komprende nia, sente Maromak nia laran-sadia no domin ne’ebé hafoun moris?”, nia husu.

Papa Francisco taka katekeze hodi husu Maromak, liuliu atu iha Tina Fiar nian ida-ne’e, komunidade katólika sira no Kreda tomak sai ba beibeik família loos ne’ebé moris no lori Maromak nia domin ba mundu.