Formasaun ba Irmán juniora sira

Venilale – Ohin, 19/04/2017  Madre Alma Castagna – Provinsiál FMA-TIN, halo seminar ho ami juniores FMA TIN hamutuk 21, kona-bá “Ha’u mak feto [konsagrada] ”. Fatin, Komunidade St. Maria Mazzarello – Venilale.

Iha seminar ne’e hahú ho orasaun ne’ebé Madre Alma rasik prepara, no ho orasaun ida ne’e tulun ami atu haree ba karakteristika sá de’it mak Maromak hein no apresia iha feto ida? Livru proverbiu sira nian haktuir katak ”feto matenek ida harii ninia uma”. Ita hotu hakarak sai feto matenek iha ita nia komunidade, Feto sira ne’ebé konfia iha nia-an rasik, respeita no defende valor importante sira hodi pronto atu terus. Iha ne’ebé istória feto sira nian, iha istória salvasaun no Maromak uza feto sira atu salva, tuir leitura Prov. 31;10-31.

Molok Madre lori ami ba tópiku ne’ebé sita ona iha leten, uluknanain ami hahú ho Film ne’ebé ami haree konabá “La Belle e la Bestia”.  Kada Irmán espontánea fahe tuir buat ne’ebé nia haree no rona, liuliu iha ne’ebé  povu sira nia esperansa ba feto sira no sira hein atu bele halo saidá? Feto sira la iha direitu atu hetan edukasaun di’ak. Maibé ikus mai, feto ida ne’e hatudu ninia liberdade hodi la interese ba ema nia komentariu sira, nia nafatin hatudu ninia aten brani no la tauk atu hasoru dezafiu sira. Nu’udar feto karakteristika ne’ebé maka’as mak sensivel ba ema nia presiza no tau matan.

Madre Alma kontínua ninia konferensia nia dehan: “Kristu saran ninia isin tanba domin”.atu hadomi ita presiza ita nia isin. Nune’e tau matan ba nia; ekilíbriu iha hahan, toba no tempu hanesan tau matan mos ba ita nia espíritu. Sé ema moris faze ida ne’e ho ekilíbriu, ema sei realiza nia-an hodi halo di’ak mós ba ema seluk.

Saida mak karakteristika iha parte feto nian?

“Ha’u mak feto”. Ita-nia isin no nia fiziolojia. Iha parte ida ne’e, Madre hatudu faze ida-idak ho ninia dezenvolvimentu pessoal nu’udar feto konsagrada ne’ebé la kous no ho feto ne’ebé kaben iha oan. Tulun ami oinsá atu bele halo diferensa no tebes, liuhusi aprezentasaun ida ne’e lori ami  dezenvolve sentidu auto estima loos ba an hodi simu ami nia-an nu’udar feto ida ho ninia forma oioin ne’ebé iha, no entre sinal isin nian presiza simu ho hakmatek tanba iha kazu ruma ne’ebé bele lori ema ba depresaun, liuliu wainhira idade ba oin.

Ikus, ami hotu haksolok hodi dehan obrigada tanba ho formasaun ida ne’e halo ami komprende kona ba ami nia-an no simu nu’udar don ida diferensa ho mane sira nian.

(Agata Freitas)