Retiru preparasaun ba Páskua – grupu “Acólitos Baucau”

Baucau – Preparasaun ba Páskua mak oportunidade atu hakle’an ita-nia mistériu salvasaun nian. Grupu akólitu Baucau nian, ho membru besik 200, halibur hamutuk iha Parókia Sagrado Coração Vila-Nova, ba loron rua, husi 10-11 Abríl, atu prepara an ba selebrasaun Páskua.

Preparasaun ne’e fasilita husi Ir Jacinta Gusmão FMA, nu’udar pregadora no ida-ne’ebé anima retiru tomak. Nia hetan ajuda husi Ir Martinha FMA no animadór sira grupu akólitu nian.

Tema retiru nian la’o nafatin ho dioseze ninia tema jerál, katak, “Komunga Kristu? Moris hanesan Nia”. Ir Jacinta Gusmão konsentra iha mistériu sira ita sei selebra iha Triduu Paskál nia laran, iha ne’ebé sai tutun Jezús nia domin nian ba umanidade. Iha loron dahuluk, akólitu sira reflete kona-ba Jezús nia domin hatudu iha Kinta Santa, liuliu ninia ukun-fuan domin nian. Akólitu sira reflete kona-ba “husik Jezús fase sira-nia ain no sira oinsá sira mós fase maluk sira nia ain”. Basá hodi husik Kristu fase ita-nia ain no halo tuir Kristu nia ezemplu ita hola parte iha Nia. Atu taka reflesaun ne’e sira halo orasaun ho ritu fase-ain nian. Reflesaun no selebrasaun ne’e prepara sira ba Sakramentu Peniténsia no Konfisaun.

Iha loron daruak, akólitu sira akólitu sira hahú ho atividade iha grupu atu hanoin kona-ba liafuan AMOR no husi ne’e halo akrónimu ba oinsá moris “AMOR” ba letra ida-idak.  Barak mak temi A ba amizade, M ba morál, O ba obediénsia, orasaun, iha mós onestidade, R ba responsabilidade. Grupu balun halo fraze husi liafuan ba letra ida-idak. Ezemplu “Aman Maromak hadomi hodi fó nia Oan Rasik mai ita”.

Hotu tiha ne’e, sira kontinua reflete kona-ba Jezús nia domin no haree ba Apóstolu rua ninia resposta ba domin ne’e: Judas no Pedro. Oinsá mak Judas ninia istória infidelidade sira-nian, ninia kaan osan no abuzu konfiansa nian lori nia atu faan raan inosente ba autoridade sira. Ikusmai nia sente remorsu, maibé la lori nia ba konversaun… nia sai dezesperadu no la hanoin ba Jezús nia liafuan no hahalok ne’ebé kontinua konsidera nia belun ida atu hadomi ho delikadeza (bele haree iha jestu fó han paun habokon ho tua ba nia). Nia haree de’it mak ninia an no ninia nakukun. Nia la haree ona Jezús nia roman ne’ebé bele halakon nakukun. Nia la’o iha dalan nakukun nian no ba tara an iha ai-hun ida. Judas hadook an husi ai-hun loos moris nian.

Pedro mós monu maibé, tipu seluk monu nian. Nia reziste Jezús fase ninia ain, iha difikuldade atu aseita Na’i hatuun nia an atu fase ninia ain sira.Pedro seidauk komprende dalan hamamuk-an nian (kenosis). Nia mós halo an asu-wain (“Maski sira monu, ha’u sei la monu.” … “Maski ha’u tenke mate ho ita, ha’u sei la nega ita.” [Mt 26.32-35]). Iha tempu prova nian, ninia halo an asu-wain sai ta’uk no nia nega Jezús. Nia diferensa ho Judas mak Pedro ninia monu la’os definitivu, bele hetan sadia liuhusi konversaun. Nia hanoin hetan Jezús nia liafuan no tanis ninia salan hodi arrepende. Pedro aprende atu dehan adeus ba ninia halo an asu-wain kona-ba ninia hahalok pesoál sira no aprende haraik-an eskolante ida nian. Nia tenke aprende atu hein ninia oras. Nia kontinua aprende atu hein, atu oinsa persevera.  Nia tenke la’o iha dalan eskolante nian atu ema mak lori nia, bainhira nia oras mai, ba fatin, ne’ebe nia lakohi bá (Jo 21.18). Husi ne’e nia aprende atu sai hanesan Kristu, hodi mate mós iha krús. Ninia dalan, tuir Na’i nia dalan. Komuñaun ho Kristu mak la’o tuir Jezús Kristu nia dalan.

Parte ikus reflesaun nian, akólitu ida-idak halo orasaun ba Jezús, oinsá la’o tuir Nia hanesan Pedro no la’ós hanesan Judas.

Retiru ne’e loke ho selebrasaun eukarístika no remata mós ho Eukaristia, selebra husi Pe Arlindo Sequeira, vigáriu espiskopál ba asuntu pastorál sira.