Dili – Iha loron 8 Abril, molok tama iha semana santa, komunidade Divina Providensia-Comoro hala’o retiro hamutuk atu prepara-an ba festa Paskua. Retiro ida ne’e partisipa husi irman sira, menina sira ne’ebé hela iha komunidade no mós menina balun husi sira nia kolega servisu (TOT no Bakery) no mós kolega balun husi universidade ne’ebé sira konvida mai atu halo retiru hamutuk.   Ida ne’ebé sai pregador ba retiru ida ne’e mak Pe. João Boavida SDB. No iha momentu konfisaun nian Pe. Manuel Fraille mai ajuda hodi fó konfisaun.

Retiru hahu ho konferensia oras ida (14:30-15:30). Remata tiha konferensia kontinua fali ho konfisaun to’o 17:00. Iha konferensia ida ne’e padre sublinha liu-liu kona ba misteriu kruz nian katak Jezús nia paisaun, hahu husi Nia terus, Nia mate no Nia moris hias. Iha momentu sofre nian, Jezús mós sente abandonadu, solidaun no hasa’e orasaun hodi reza orasaun salmo 22 ne’ebé povo Israel sira reza, tanba Jezús mós esperiensia hanesan povo Israel ne’ebé hakilar maka’as liu ba Maromak iha momentu angustia no terus nia laran maske sente Maromak abandona, Maromak sai silensiu, nonok no la hatan buat ida. Maibé ikus mai mosu transformasaun husi sentimentu terus nian muda ba sentimentu hahi nian, agradese nian tanba deskobre fali Maromak Nia kbiit no Nia prezensa. Haree fali ba Jezús nia esperiensia, hatudu mai ita sofrimentu ida ne’ebé boot. Husi sofrimentu transforma fila-fali ba Gloria bo’ot no resposta ba Jezús nia orasaun mak moris hias husi mate.

Iha Jezús Nia paisaun, nia terus la’os terus mamuk ida maibé iha solidariedade ho ita no terus ba ita tanba domin. Iha mós santu/a barak ne’ebé hetan esperiensia abandonado, mamuk no la sente Maromak Nia prezensa maibé sira nunka para atu harohan tanba sira nia fidelidade ba Maromak bo’ot liu. Ezemplu mak St. Teresa de Calcuta, durante tinan 30 nia reza maibé la sente Maromak nia prezensa iha nia moris. Maske la sente Maromak Nia prezensa, nia nunka para atu harohan tanba nia kompremete-an ba Maromak ho total. Hodi haree ba esperiensia sira ne’e, ita husu ba ita-an rasik; oinsa ita enfrenta situasaun difisil sira, fasil atu fila kotuk ka iha laran metin nafatin ba Maromak?

Ho perguntas ida ne’e tulun foinsa’e sira atu reflete hodi prepara-an ba hakbesik-an ba sakramentu rekonsiliasaun nian. Padre mós motiva liu-tan katak; lato’o de’it atu rona konferensia sira maibé iha tempu retiru buat ne’ebé importante liu mak konfesaun tanba konfesaun ne’e sakramentu ida. Nune’e presiza hatene katak aspetu importante husi retiru mak momentu atu para oituan, atu reflete no atu halo silensio. Silensiu atu husik tempu ba Maromak ko’alia. Iha silensiu Maromak ko’alia no ita rona. Maibé atu bele rona di’ak presiza nonok no kria iha an rasik silensiu interior. Tanba iha silensio, Maromak hatudu Nia-an no tulun ita ema atu hatene saida mak Maromak hakarak husi ita ema no mós tulun ita atu halo diresaun ba moris.

(Miranda da Cruz)