Husi irmá Cecilia del Mundo

Dili – Fulan ida liubá iha 28 Abril,  Bariru foun ida ne’e ne’ebé tuur iha foho João Paulo nia okos iha Tasi Tolu , simu naran Bairru Maria Ausiliadora.  Sira ne’ebé hela iha ne’e senti haksolok no orgullu ba naran ida ne’e. Madre ida no novisa nain tolu  halo oratorio iha ne’e kada Domingu.

Iha loron 26 Maiu,  Bairru ne’e selebra dalauluk sira nia festa  atu fo onra ba sira nia Padroieira  Maria Ausiliadora  ne’ebé nia festa litúrjika mak 24 Maiu.  Uluknanain, estatua Maria Auxiliadora nian ba vizita familia ida-idak iha Bairru laran  no vizinu  sira partesipa iha orasaun Rosario nian kalan-kalan.

 

Programa ba selebrasaun ohin nian mak simples  maibe signifikativu ba labarik, foinsa’e  no aman-inan sira, ne’ebé halibur hamutuk iha fatin furak ne’ebé sira rasik prepara ho sira nia kreatividade. Husi familia ida nia uma,  lori estatua Na’i-Feto  iha prosesaun ba fatin halibur selebrasaun nian.  Iha ne’e  sarani  no konvidadu sira  reza santo Rosario , ho intensaun kada misteriu. Depois  sira simu ho danza tradisional no tau salendang  ba Padre Elias SDB ne’ebé vizita sira dalauluk  nu’udar  vise-paroku Igreja Maria Ausiliadora, Comoro nian. Padre Elias fó parabéns ba sira  tan sira hatene hili  naran  ne’ebé diak no signifikativu ba sira nia Bairru. no mos  tan sira  hili atu  hela iha sira nia fatin  duke halai  atu  nontong   kompetisaun  Karavana nian  . Padre  fó hanoin ba sira  kona ba sira nia obrigasaun atu  tulun malu nafatin  hanesan Maria “tulun nain”. Padre fó bensaun Maria Ausiliadora nian  ba bairu ida ne’e liu-liu ba sira  hotu ne’ebé presente. Sira oferese ai-han ba ema hotu-hotu   no durante konviviu grupu oin-oin labarik nian  hatudu  danza modernu. Atu remata selebrasaun  ne’e,   Madre Cecilia husikba sira Don Bosco nia   liafuan: “ Sé mak iha laran metin boot ba Maria Auxiliadora, sei hare saida mak milagre.”