Sidade Vaticano – Iha domingu loron 26, Papa Francisco halo apelu ida ba sarani sira ne’ebé akompaña iha orasaun Angelus nian: nia husu orasaun ba “konversaun mafiozu no mafioza sira nian”.

“Ha’u hanoin ba ema barak nia terus, mane sira, feto sira no mós labarik sira, ne’ebé máfia sira esplora no desfruta sira hodi halo sira sai atan ho prostituisaun no moris iha presaun sosiál. Iha esplorasaun no eskravidaun ne’e nia kotuk iha máfia sira, Ita reza atu mafiozu no mafioza sira-ne’e konverte sira nia an ba Maromak”.

 

Papa Francisco nia liafuan sira fó hanoin kona-ba ezortasaun ne’ebé João Paulo II halo iha loron 9 Mai 1993 iha Valle dei Tempi, Agrigento (Italia), bainhira ba ema Sicilia nian nia konvida atu hakribi “sivilizasaun kontrária, sivilizasaun mate nian”. João Paulo II ko’alia ho modu diretu ba mafiozu sira, hodi fó sala ba sira ba ema sisilianu sira-nia terus no akuza sira katak la respeita Maromak nia Liafuan.

Apelu ne’ebé Papa Francisco halo iha domingu ne’e refere ba beatifikasaun iha loron sábadu, 25, iha Palermo, Pe. Giuseppe Puglisi nian, amlulik no mártir, ne’ebé máfia oho iha 1993.

“Pe. Puglisi mak amlulik ezemplár ida, ne’ebé dedika an liuliu ba pastorál juveníl. Hodi eduka sira tuir Evanjellu, nia hasai sira husi delinkuénsia, ne’ebé hakarak halakon nian, hodi oho nia. Maibé, loloos, nia mak manán, ho Kristu Resusitadu”.

Koalia kona-ba Santíssima Trindade, Papa Francisco dehan: “ Ita-nia Maromak la’ós Maromak spray ida, nia konkretu, la’ós abstratu, maibé iha naran ida: “Maromak mak domin!” La’ós domin sentimentál ida, emotivu, maibé Aman nia domin ne’ebé sai orijen ba moris hotu, Oan nia domin ne’ebé mate iha krús no moris-hi’as, Espíritu nia domin ne’eb´ehafoun ema no mundu. Hanoin katak Maromak mak domin halo di’ak maka’as mai ita, tanba hanorin ita atu hadomi, atu saran an hanesan Jezús halo saran an mai ita, no la;o ho ita”.

No atu reforsa konseitu domin nian ne’ebé nafatin hamutuk ho ema iha istória, Papa Francisco kontinua: “ Santíssima Trindade la’ós produtu rasiosíniu umanu , maibé Maromak nia futar oin ne’ebé Nia rasik revela, la’ós husi tronu ida nia leten, maibé hodi la’o ho umanidade (…) Maromak la’o ho nia povu iha povu Israel nia istória no Jezús la’o nafatin ho ita no promete mai ita Espíritu Santu, nia mak ahi, nia mak hanorin mai ita buat hotu ne’ebé ita la hatene, nia mak iha ita-nia laran gia ita, fó mai ita ideia di’ak sira no inspirasaun di’ak sira”.  

Konsiderasaun ikus nia fó ba Maria, ida-ne’ebé –Papa Francisco afirma – tanba Kristu, “oras ne’e iha ona Trindade nia glória” no, tempu hanesan, Inan ida besik liu ba nia oan sira.” Nia mak Inan esperansa nian. Nia mós Inan ne’ebé konsola ita, Inan Konsolasaun nian no Inan ne’eb´eakompañ aita iha dalan.”