Fuiloro – Atu selebra Kristu nia paixaun iha tempu paskua,  ami nia komunidade Morano Fuiloro halao  retiru no konfisaun, pregador  ba retiru ne’e mak Padre Tomas, SDB. Retiru ne’e halao iha kinta lokraik 05.30 to’o remata, partisipantes ba retiru ne’e husi menina 50 no komunidade edukativa hamutuk ho madre sira.

Retiru ne’e ami hahu uluk ho selebrasaun penitensial, ne’ebé prepara husi Madre Sebastiana nu’udar diretora uma nian, reflesaun furak halo ami sente urjente atu hateke ba ami nia-an, buka fali ami nia frakeza sira ne’ebé halo ami dook husi Maromak, atu ba hakbesik-an ba Padre atu halo konfisaun, hodi hadiak fali ami nia moris no konxiente ba Jesus ne’ebé fuan la para atu hadomi ami nafatin.

Ho tema ne’ebé hakerek tiha ona iha leten Padre haktuir katak: komunga Kristu katak simu  Kristu, atu simu Kristu tenke hatene Nia ka koñese Nia, nune’e bele sai hanesan Nia. Haree ba misteriu ne’ebé ita sei selebra iha semana santa. Ida ne’e mak misteriu salvasaun nian, iha ne’ebé Jesus Kristu terus atu salva ita. Ita sei rona evanjellu paixaun Kristu nian iha domingo ramos no sesta feira santa, ita haree ba Kristu nia terus, ita hatene Kristu katak hatene terus, koalia kona ba terus ita husu ba ita nia-an, ema terus tamba saida? Tamba ema seluk nia diak no mos tanba monu ba sala. Realidade iha moris mak tenke terus, laiha terus laiha moris.  hanesan liafuan ne’ebé ema matenek nain sira dehan “SOMETHING TO SUFFER, SOMETHING TO OFFER. NOTHING TO SUFFER NOTHING TO OFFER”.

Iha ema nia isin lolon iha parte rua ne’ebé terus, isin nian no klamar nian. Isin nia terus fasil liu atu bele kompriende maibe klamar nia terus ka terus moral nian, influensia mos terus isin nian. Wainhira hasoru terus tenke buka dalan atu liu ka manan. Nune’e terus ne’e liu tiha bele hetan ksolok. Iha sagrada eskritura, ita haree profeta Job nia moris, hatudu nia fidelidade ba Maromak maski hasoru terus oi-oin. Terus isin no klamar nin maibe la halakon nia fiar ba Maromak.

Adaun ho Eva hatudu sira nia terus tamba monu ba sala, tan ne’e sira subar. Subar katak iha buat ruma lalos, ida ne’e lori terus tamba la hakmatek. Saun João Paulo II koalia kona ba Kristu nia terus haree liu ba São João nia evanjellu “ Maromak hadomi tebes mundo, tan ne’e haruka Nia Oan Mane atu soi ema, atu ema labele lakon maibe atu hetan moris rohan laek. Hanoin nafatin ba katak Kristu terus tamba ha’u, hodi  haka’as-an sai hanesan Kristu sinal katak ita komunga Kristu, sai hanesan Kristu, hola parte iha Nia terus no mate. Importante  mak ita terus atu ema seluk bele sai diak, atu ita nia moris bele lori Kristu ba ema seluk no lori ema seluk ba Kristu.

Molok Padre remata ninia pregasaun,  nia koalia frase ida ba sira nia prepara-an ba konfisaun, hodi foti  Don Bosco nia liafuan ne’ebé  nia repete bebeik ba nia oan sira “ ema ne’ebé konfesa didi’ak sei haksolok liu, dala tolu liu fali baibain” nune’e padre husu ba foinsa’e feto sira ne’e atu prepara-an didi’ak atu bele halo konfisaun ho di’ak, nune’e bele selebra semana santa ho ksolok.

 

(MARIA SARMENTO)