Liturjia domingu ikus Kuarezma nian konvida ita atu kontempla Maromak ne’ebé, tan domin, tuun mai hasoru ita, fahe ita-nia umanidade, halo An sai ema nia atan, husik ema oho Nia atu manán egoízmu no salan. Krús aprezenta mai ita lisaun aas liu, ain-hakat ikus iha dalan moris foun nian, ne’ebé iha Jezús, Maromak propoin mai ita: saran moris tanba domin.

Leitura dahuluk aprezenta mai ita profeta anónimu ida, Maromak bolu atu fó sasin iha nasaun sira leet Liafuan salvasaun nian. Maski hasoru terus no persegisaun, profeta ne’e konfia iha Maromak no konkretiza, ho fidelidade boot, Maromak nia projetu sira. Sarani sira iha tempu uluk haree iha “atan” ne’e Jezús nia figura.

Leitura daruak aprezenta mai ita Kristu nia ezamplu. Nia hakribi egoízmu no foti-an, atu hili obediénsia ba Aman no servisu ba ema sira, to’o saran moris rasik. Maromak nia Liafuan propoin dalan moris ida-ne’e mai ita.

Evanjellu konvida ita atu kontempla Jezús nia terus no mate: momentu aas liu moris nian, atu soi ita ema sira husi buat hotu ne’ebé lori egoízmu no moris-atan. Iha krús, revela tiha mai ita Maromak nia domin, domin ida ne’ebé la rai buat ida ba an rasik, domin ida ne’ebé sai don totál.

Download