Dili – Iha loron 1 Abril 2017, família husi kursu computador Balide halao enkrontru ho tema ”Amoris Laetitie “  ne’ebe foti husi Amo Papa Francisco nia Exortação Apostolica, sai topiku interesante ba família kursu sira nian. Palestra ne’e hato’o husi  Irma Alexandrina Pinto, FMA.

Tema ba enkontru ne’e liuliu haree ba moris família ohin loron nian  tuir kontestu real iha  Timor.

Família sira ne’ebe partisipa mak inan aman,  ou família sira ne’ebe oan sira hela hamutuk/ wali ( tiu, tia, maun e bin).

Dokumentus  ne’ebe fahe iha enkontro nee mak tuir kapitulu sira ne’ebe iha relasaun ho família ohin loron nian.

Família nia hun ou abut mak mai husi Maromak.   Haree ba kontestu biblia : “Maromak halo ema tuir Nia ilas, halo sira nudar Maromak Nia ilas, Nia halo sira mane no feto.”

Tinan ne’e mos Diocese Dili  selebra Tinan biblia nian. Biblia mak sentru ba família ida-idak tanba  Iha família mak sai fatin katekese nian ba oan sira, liu-liu hodi lee hamutuk Biblia no fahe  iha família laran, aman inan sira uluk nanain sai mestre fe  nian ba oan sira.

Realidade no desafius família sira nian sai mos diskusaun boot iha grupu laran, liu- liu haree ba moris ohin loron nian problema barak mak ataka família sira too sai haketak malun.  Pontus sira iha diskusaun nia laran mak hanesan:

• Falta inan aman sira nia interese ba oan sira, ( falta unidade iha família laran, tanba inan aman sira preokupa liu ho sira nia serbisu duke oan sira)
• Falta de komunikasaun iha família laran
• Falta de aproximasaun ba malu ….. nst

Realidade sira ne’e mosu tanba interese inan aman nia sai prioridade duke fo prioridade ba oan sira nia dezenvolvimentu nudar humanu e Kristaun.

Husi enkontru dahuluk ho inan aman kursu sira nian nee sai naroman ida ba família sira atu sira konsente ba moris nee nia valor hodi halo tuir obrigasaun nudar  aman ka inan  ba oan sira nia diak, tanba família mak kolaborador Maromak nian.

Iha parte segundu Irma Ines mos fahe informasaun kursu nian ba inan aman sia kona ba Centro de Formasaun ne’e hetan ona akreditasaun husi Guverno Timor leste iha Area administrasaun Jeral  I & II, tan nee materia sira mos iha ligasaun ho area nee mak hanesan:  Materia Computador, Administrasaun, Finansas, Komunikasaun, Lingua Ingles eTetun, Esperensia Serbisu, Organiza Serbisu, Saude Siguransa ba serbisu,  Matematika, Internet. Treinadora  ba lingua Ingles Volontariu husi Australia e Matematika volontario husi India, Irma nain 4  mos hanorin ho leiga ida iha parte material Computador nian.

Tempu hanesan fahe mos ba família sira kona ba regulamentu kursu nian no mos fo  hatene ba sira kona ba oan sira nia aprendizajen iha Centru nee lao ho seriedade, tanba Centru ne’e nia objetivu mak atu prepara foinsae sira liu-liu sira iha mundu serbisu nian ho kualidade ho valores umano no Kristaun ne’ebe diak.  Ikus liu ami mos nafatin fo apelu ba sira atu halo vizita ba sira nia fatin ida-idak hodi fahe Maromak Futar lia ho família kursu sira nian tanba tinan nee mos Diocese selebra tinan Biblia nian.

(Ines Freitas)