Dili – Iha loron uluk fulan Abril eskola Maria Auxiliadora ho asosiasaun sira ne’ebe eziste iha eskola ne’e selebra loron mártiriu misionáriu hodi reza tersu  hamutuk. Sira reza hodi hanoin ba martíriu sira ne’ebé namkari iha kontinente 5 nia laran. Sira mós hanoin mos Misionária no misionáriu hotu ne’ebe hela iha mundu tomak hodi haklaken Kristu nia domin ba ema hotu ne’ebé presiza.

Ho tempu hanesan grupu Infánsia no grupu “Amigos de Domingos Savio” (ADS)  hala’o asaun karidade iha fatin la hanesan; grupu ADS ba iha bairru Beduku no grupu Infánsia ba iha bairru Masilidun, fatin sira ne’e iha area parokia Maria Auxiliadora nian.

Sira bá la lori sasan maibé lori Maromak nia domin no  nia Liafuan  hodi reza hamutuk ho ferik katuas no labarik sira iha fatin refere. Labarik no adolexente sira-ne’e, husi ki’ik kedas aprende atu sai solidáriu liuhusi orasaun no asaun konkreta ho maun no biin-alin sira seluk, iha rai laran no iha rai dook.

(Grinalda da Costa)