Hakerek-na’in ir Alexandrina Pinto

 

Dili/Balide – Komunidade Balide hamutuk ho komisaun junventude Paroquia Balide halo mini Kampu Maria iha Paroquia, ho Tema “Maria modelo fiar nian”.

 

Molok hala’o aktividades, uluknanain ami hahu ho missa solene  Maria Auxiliadora nian ne’ebe preside husi Amo Justino, Pro  no depois de missa ida-idak ba iha grupo, tuir fatin ne’ebe komisaun organizadora sira prepara mak; Nazare, Belem, Ain Karim no Cana. Iha ne’eba Irman ne’ebe responsavel ba grupo ne’e  fo input, no  hotu tiha, sira ba halo reflesaun pessoal, hafoin ba iha assembleia  no sambil prepara ninia emar ida ba mandatu missionaria. Nune’e depois de almoco, halo serimonia badak ida katak halo orasaun no amululik entrega Kruz simbolu Jesus Kristu rasik ne’ebe sei akompanha no medalha Na’i Feto nu’udar modelu hateke ba Nia hodi haklaken Kristu ba nia maluk sira, liu husi; fatin, eventus no kona ba Maria ne’ebe sira haklean no deskobre iha grupo.

Partisipantes sira ne’e mai husi Suco lima Paroquia Balide nian, hamutuk ho estudantes Cristal, Escola Operario S.Jose,  Oratorio Balide, Akolitus no Frater Jesuita sira.

Molok  remata ami halo evaluasi kiik ida ba sira baseia ba esperiensia ne’ebe sira sente katak sai nudar bukae ba sira, barak mak share sente kontenti  tanba hetan oportunidade diak hodi bele partisipa iha eventus ne’e no sente orgulho tanba  aumenta konesimentu kona ba Maria ninia atitude sira mak hanesan: Fiar, domin, haraik-an, simples, rona no halo tuir no iha balun ne’ebe halo komprimisu ba nia-an katak hakarak lao hamutuk ho Maria no lori Maria ba sira ne’ebe seidauk iha domin ba nia.

Iha Kampu Maria nian ida ne’e iha objetivo rua;

• Tulun sira atu iha konhesementu kona ba Na’i Feto no liu-liu tulun sira atu kuda devosaun ba Na’i Feto
• Tinan ida ne’e tinan  fiar nian nune’e tulun sira hodi hateke ba Maria nudar modelo fiar nian.