Lospalos – Membru Asosiasaun Devota Maria Auxiliadora halibur hamutuk iha S. Domingos Savio Lospalos iha loron 31 marzo – 01 Abril 2017, atu halo retiru Quarezmal  hamutuk nudar membru ADMA nivel Nasional nian, mai husi uma salesiana sira: Maliana, Dili, Venilale, Laga Quelicai, Fuiluro no Lospalos nudar uma nain ba retiru tinan ida ne’e.

Partesipante sira hamutuk  ema 305. Komposta husi membru ADMA husi fatin oi-oin. Marka mos prezensa presidente ADMA nasional sra. Fatima Belo ho ninia estrutura padre delegadu ADMA  nasional nian, pe. Manuel Ximens, pe. Tomas diretor komunidade Salesiano Lospalos, pe. Jose de Sa husi Venilale, no pe Rolando nudar predikador ba retiru ne’e. Iha mos FMA nain 4; Ir. Ernestina Fatima delega lokal ADMA ho Ir. Sebastiana Fuiluro nian, Ir. Sanzinha delegada ADMA Baucau, Ir. Teresa do Carmo delegada ADMA Kailako Maliana.

Loron dahuluk retiru nia tema jeral  la’o tuir tema Dioseze Baucau nain “Komunga Kristu? Moris hanesan nia”. Konferensia fahe ba parte haat. Parte dahuluk padre predikador koalia kona ba Via Sakra. Hodi dehan katak Via Sakra durante tempu forte ne’e, tenki lori mai ita Kompromisu ida, ne’ebé forte atu moris hanesan Kristo.

Depoizde konferensia partisipante ba retiru hotu, partesipa Via sakra hamutuk ho sarani sira iha parokia. Ne’e tulun membru ADMA sira atu bele tama klean no komprende no hadomi dalan Kruz nian.

Hafoin kontinua ho konferensia daruk ho tema “Jesus Nia esperienza kona ba tentasaun sira”. Padre predikadore aprezenta katak iha Tentasaun apresenta mai ita elementus tolu (3), ne’ebé ita hasoru iha ita nia moris loro-loron. Elementus dahuluk mak Poder, elementu daruak mak Pozisaun, no elementu datoluk mak Rikusoin.

Bainhira ema iha podere, iha pozisaun no buka deit rikusoin mundu nian, ema iha tendensia atu hanehan ema seluk. Ne’e akontese iha moris loro-loron nian.

Loron dahuluk taka ho Adorasaun Santissimo iha parokia.

Iha loron daruak, loke ho orasaun Laudes hamutuk. Hafoin iha konferensia datoluk ho tema Eukaristia. Lori ba moris iha unidade. Kristu mak ulun no kreda mak isin lolon. Hanesan Hostia mai husi trigu musan barak, ne’ebé presiza dulas no harahun atu forma paun … Hostia Ida. Nune’e Tua mai husi uvas fuan barak. Atu sai tua ne’ebé midar presiza harahun didiak. Nune’e moris sarani tenki halo sakrifisiu, atu bele sai sarani ne’ebé komprometidu. Hatene fahe fiar ho maluk sira. Aprende fahe knar ba maluk sira, atu nune’e sai furak liutan moris sarani iha unidade. Hodi moris hanesan Kristu.

(FMA Fuiloro)