Maria Ausiliadora nia ilas ne’ebé to’o iha Timor tinan 25 liubá, vizita komunidade FMA hotu iha Timor laran

 

Dili – Komunidade Divina Providénsia, ohin kalan, iha Vésperas Festa Maria Ausiliadora nian, simu Na’i-Feto peregrina Ausiliadora iha sira-nia uma.Na’i-Feto ne’e mak ida ba dalauluk mai husi Itália hamutuk ho irmán na’in tolu ne’ebé loke misaun iha Venilale, Timor-Leste.Peregrinasaun ne’e hahú iha loron 13 Maiu ho uma S. José, Dili.

 

Foin-sa’e sira ne’ebé serbisu iha Centro João Paulo II, Bakery no Sewing, nune’e mós estudante ne’ebé hela iha internadu simu Na’i-Feto ho knananuk no ho lilin ne’ebé lakan. Sira simu husi komunidade S. José ne’ebé lori hodi entrega ba sira.

To’o tiha iha Divina Providénsia irmán Luz Stella husu foin-sa’e sira atu loke an ba Maria: “Ita agradese tebes duni  ba Na’i-Feto ne’ebé ohin kalan mai iha ita-nia uma. Aban ninia festa. Nia akompaña madre FMA sira durante tinan 25 iha sira-nia dalan. Ohin Nia kontinua tau matan no akompña ita. Nia hela iha-ne’e nu’udar Belun, nu’udar Inan, nu’udar Mata-dalan. Ita, bainhira iha tempu mai tuur iha-n’e, iha nia oin atu ko’alia ho nia hanesan ita ko’alia ho ita-nia belun ne’ebé besik liu ita-nia fuan. Ita iha nafatin buat ruma atu fahe ho Nia… ita mai! Nia hela ho ita iha loron 10 nia laran, nune’e ita aproveita didi’ak”.

Molok taka, irmán Luz konvida atu harohan hamutuk Ave Maria ida husu tulun atu proteje ema hotu ne’ebé ita hadomi, proteje nasaun no proteje ida-idak, hanesan nia halo beibeik. Maria mak halo buat hotu, bainhira ita la bele ona ka la hatene oinsá. Viva Maria Tulun-Na’in!