Sidade Vaticano – Kuarta 22 Maiu, mak loron Audiénsia Jerál iha Prasa S. Pedro, nakonu ho sarani sira atu kumprimenta Papa Francisco ne’ebé iha ninia katekeze ohin nian aborda tema Espiritu Santu no misaun evanjelizadora Kreda nain:

“Iha Kredu, tuir kedas termu profisaun fiar nian iha Espíritu Santu, ita hateten: ha’u fiar Kreda ida mesak, santa, katólika no apostólika». Iha ligasaun kle’an entre realidade rua fiar nian ne’e, tanba Espíritu Santu mak haraik moris ba Kreda no gia nia ain-hakat sira.”

 

[Asesu kópia ho lia-portugés]

 

Ho liafuan sira-ne’e Santu Padre foka lialoos konkretu ida ne’ebé lahó Espíritu Santu nia prezensa no asaun, Kreda la bele moris no la bele realiza misaun ne’ebé Jezús Resusitadu konfia atu bá mundu tomak hodi halo povu hotu sai dixípulu. Evanjeliza mak misaun Kreda nian no la’ós de’it ema balun nian, maibé ema hotu nian. No motór boot evanjelizasaun nian mak Espíritu Santu. Prezia loke fuan ba Espíritu Santu nia hahalok.

Sinál sira ninia intervensaun mak: primeiru, unidade no komuñaun, hanesan haree iha loron Pentekostes, bainhira ema ida-idak bele rona Apóstolu sira ko’alia iha sira-nia lian rasik. Ne’e tanba ema hotu ko’ali alian foun: lian domin nian ne’ebé Espíritu hasuli iha ita-nia fuan sira.

“Lian Espíritu Santu nian, lian Evanjellu nian mak lian komuñaun nian, ne’eb´ekonvida atu supera tatakan no indiferensa, dicizaun no kontrapozisaun sira. Ita hotu tenke husu  ba an rasik: oinsá mak ha’u husik Espíritu Santu gia ha’u atu ha’u-nia testemuñu fiar nian sai ida unidade no komuñaun nian? Ha’u lori liafuan rekonsiliasaun no domin nian katak Evanjellu iha ambiente sira ha’u moris bá? Dalaruma ita haree hanesan ohin loron repete fali buat ne’ebé akontese iha Babél: divizaun sira, inkapasidade atu komprende, rivalidade, inveja, egoízmu. Lori Evanjellu katak ita mak uluknanai haklaken no moris rekonsiliasaun, perdaun, dame, unidade, domin ne’ebé Espíritu Santu haraik mai ita.”

Sinál daruak mak korajen iha haraik an ne’ebé Espíritu haraik ba mensajen Evanjellu nian, hodi hamosu nafatin enerjia foun, dalan foun no audásia foun ba misaun.

“Ne’e mak efeitu seluk Espíritu Santu nia asaun nian: korajen atu haklaken novidade Jezús nia Evanjellu nian ba ema hotu, ho frankeza, ho lian maka’s. Iha momentu hotu no iha fatin hotu. No ida-ne’e akontese mós ohin ba Kreda no ba ita ida-idak: ahi Pentekostes nian, asaun Espíritu Santu nian, hasai nafatin enerjia foun misaun nian, dalan foun hodi haklaken mensajen salvasaun nian, korajen foun atu evanjeliza.”

Elementu datoluk mak ida orasaun nian. Ba evanjelizasaun foun ida presiza hahú husi orasaun enkontru kle’an ida no íntimu ho Na’i. Relasionamentu fiél no intensu ho Maromak de’it mak permite ita sai husi ita-nia tatakak no haklaken Evanjellu ho parresia.

“Evanjelizasaun foun ida, Kreda ida ne’ebé evanjeliza tenke hahú nafatin husi orasaun, husi hamulak, hanesan apóstolu sira iha Senákulu, ahi Espíritu Santu… “

“Lahó orasaun ita-nia hahalok sai mamuk no ita-nia haklaken la iha klamar, la iha Espíritu nia kbiit.”