Dili – Komunidade B. Eusebia Palomino, aleinde eskola, iha mós pastorál seluk ne’ebe ami halao hela  mak vizita prizaun sira no vizita família. Vizita prizaun fulan rua dala ida vizita, vizita família semana ida dala ida iha loron domingu.

Relasiona ho prizaun tinan kotuk Madre Carmen  mak asumi knaar ne’e. Nune’e, husi parte prizioneiru sira husu hakarak hetan Liafoun Di’ak (Testamentu Foun), Hananu ba Na’i no Ha’u fiar (katesizmu badak) kada ema ida, ema ida-idak iha ninian atu sira bele le’e reflete,  atu nune’e sira sente katak Maromak de’it mak bele muda ema ida-idak nia moris.

Entaun, ami buka benfeitór sira atu bele tulun hodi hatan ba sira nia pedidu ne’e ikus mai hetan duni: husi “INTERNATIONAL AID TO THECHURCH IN NEED”, iha Alemanha. Sira fó osan ho montante  $ 2.400.00 atu hodi sosa Hananu ba Na’i 200 Liafoun Di’ak 200 no Ha’u fiar 100.

Nune’e iha loron domingu, 26 de Marsu, Madre Emelinda no Padre Manuel Fraile lori ba hodi halo selebrasaun no fahe ba prizioneiru sira ida-idak, iha prizaun Becora. Hananu ba Na’i 100, Liafoun Di’ak 100 no Ha’u Fiar 100. Ohin loron knaar ne’e madre Ermelinda mak responsavel, hodi la’o hamutuk ho padre Manuel Fraile.

Ami komunidade mós haksolok hodi agradese ba doadór sira nia tulun hodi akompaña sira ho ami nia orasaun loro-loron nian.

(Grinalda da Costa)