Lectio divina ho oratorianu sira iha Tasi-Tolu
Dili – Esperiénsia primeira no úniku, Lectio Divina ho oratoriano sira no ho sira-nia familia sira rasik, iha sentru Oratoriu-Bairru Maria Ausiliadora, Tasi-Tolu, loron 26 Marsu. Lectio Divina, la’o ho susesu no efetiva tanba husi irmã no novisia iha preparasaun maxima, kria ambiente no klima orasaun nian. Iha irmã ida prepara aman-inan oratoriano sira nian hodi fó formasaun Bibliku no metodu Lectio Divina nian, ho objetivu atu ema sira kompreende, hatene hodi hadomi Maromak Futar lian.
No atu tama kle’an no koxiente liután kona-ba Maromak Nia prezensa iha Nia Futar liafuan, ema hotu ne’ebé partisipa iha Lectio Divina hala’o prosisaun ho Maromak Nia Liafuan nu’udar povu Izrael ne’ebé sai husi Egitu liuhusi tasi ne’ebé fahe ba rua. Nune’e oratorianu ho sira-nia familia hamutuk ho animadora no irmã hamutuk la’o tuir povu Izrale nia ain fatin liuhusi tasi ninin hodi reflete Maromak Nia protesaun ba Nia povu haktuir iha Ezodu: “ Maromak Nia liafun iha Moises nia tilun fuan nian no ninia aitonka iha Moises nia liman (kf Es 17,9.11) Moises baku aitonka iha tasi laran no tasi fahe ba rua, povu izrael hetan salvasaun husi inimigu nia liman. Maromak akompaña Nia povu durante tinan ha’atnulu nia laran iha dezertu, Na’i salva Nia povu-koalia ba sira no ho asaun konkretu fó bee no fó aihan hatun Manna husi lalehan.
Na’i dehan: Ha’u haree ha’u-nia povu nia terus iha Egitu, no Ha’u rona sira-nia hakilar , Ha’u koñese ninia terus sira, Ha’u tun atu hodi halo sira livre no halo sira sa’e iha foho ida ne’e, rai ida furak no luan, iha rai ne’ebé produz susubeen no banibeen,.
Mak ne’e, Israel sira-nia hakilar to’o Ha’u tilun Ha’u sei hamutuk ho ó”. Durante prosisaun rona Maromak Nia futar lian hafoin hotu hatan ho knananuk:Escuta Israel, o Senhor Teu Deus quer falar. Nune’e ho klima silensiu nian grupu sira tuir tinan ba iha ida-idak nia fatin hodi hahú Lectio Divina, no tinan ne’ebé ki’ik liu hanesan 1-3 anos uza metodu narativu, no hirak ne’ebé hatene lee tuir metodu lectio nian, no lectio ne’e durasaun iha oras ida nia laran. Evanjellu ne’ebé mak ami foti hodi halo Lectio Divina ne’e mak Evanjellu Domingu 4o Kuarezma nian, “Jezús kura ema matan delek haree fila-fali”,(Jo 9,1-41).
Esperiénsia ne’e animadora sira haksolok nune’e sira dehan: Maromak Nia futar liafuan haroman no book Nia povu nia fuan. Tanba hotu tiha Lectio Divina, buat di’ak mak ema ki’ik eh boot iha hakarak boot atu kontinua no husi familia sira husu se bele karik fulan ida dala ida ka dala rua.
(Lucia Pereira)
