Iha Domingu dalimak Kuarezma nian, liturjia garante ita katak Maromak nia projetu mak komunikasaun vida ida ne’ebé ultrapasa ho modu definitivu vida biolójika: vida definitiva ne’ebé supera mate.

Iha leitura dahuluk, Jahwéh oferese ba nia Povu iha ezíliu, dezesperadu no lahó futuru (kondenadu ba mate) moris foun ida. Moris foun ne’e mai husi Espíritu, ne’ebé sei kria foun fali Povu nia fuan no integra nia iha dinámika ida obediénsia nian ba Maromak no domin nian ba maun-alin sira.

Evanjellu garante ita katak Jezús mai realiza Maromak nia projetu no fó ba ema sira moris definitivu. Sai Jezús nia “belun” no adere ba Ninia proposta katak tama iha vida definitiva. Fiar-na’in sira ne’ebé moris nune’e esperimenta mate fíziku; maibé sira la mate: sira moris ba nafatin iha Maromak.

Leitura daruak fó hanoin ba sarani sira katak, iha loron Batizmu nian, sira hili Kristu no moris foun ne’ebé Nia oferese. Leitura konvida atu sai koerente ho hilin ne’e, atu halo Maromak nia obra sira no moris “tuir Espíritu”.

Download