Dili – Loron 19 Maiu, akontesimentu boot ba Inspetoria TIN, tanba loron ne’e loron konsolidasaun maternidade nian, basá liutiha tinan 25 moris Inpsetoria TIN nian, nia hahoris misionária rua, ne’ebé saran an rasik hodi hateke ba orizonte foun no hakat liu rain rasik. Misionariedade mak buat ida komún ba batizadu hotu, maibé Na’i haraik ba ema konsagrada/u ruma vokasaun daruak ad gentes.

“Komunidade FMA sira mak komunidade iha misaun, komunidade ida ba Reinu iha kontestu ne’ebé nia moris bá”, liafuan irmán Alaíde nian iha enkontru ho irmán perpétua sira.

Pergunta ruma atu hahú enkontru mak: “iha ohin istória nian oinsá sai komunidade FMA nian iha misaun? Oinsá fó sasin profesia nian kona-ba primadu Maromak nian iha ita-nia moris? Oinsá rona filafali  hakilar ne’ebé mai husi fuan barak?” Oinsá moris ohin ita-nia identidade nu’udar edukadora saleziana?”

 

Tuir irmán Alaíde, ita-nia inspirasaun mak Komunidade sarani dahuluk Jerusalém nian, ne’ebé sai movimentu ida Jezús nian. “Liafuan sai fonte no Liafuan ne’e mak dixípulu sira lori ba nasaun hotu.”. Husi Jerusalém ba Mornese. Komunidade dahuluk Mornese nian mós moris estilu ida iha ne’ebé sai komunidade ida ho abut iha Jezús, nakonu ho paixaun ba Nia, komunidade místika no profétika, ne’ebé kuda espíritu misionáriu ho orizonte nakloke, apostóliku, komunidade ida  haksolok atu serví Na’i iha menina sira.

Durante enkontru irmán sira reflete mós kona-ba sá mak tenke reforsa atu karizma salezianu bele sai vizivel liután liutiha tinan 25. Husi partilla sai elementu sira hanesan tuirmai ne’e: testemuñu komunitáriu laran-sadia no fraternidade nian; paixaun ba Maromak no foin-sa’e sira; konsolidasaun vida komunitária iha dimensaun hotu (umanu, karizmátiku, espirituál, apostóliku); fidelidade hodi kompromete an ba vida relijioza ida enkarna an iha realidade ohin nian; tradús iha hic et nunc espíritu família Valdocco no Mornese nian; sai komunidade misionária DMA no vado io nian.

Irmán Alaíde konvida atu komunidade ida-idak hakle’an fali elementu sira-ne’e hodi formula “Ha’u Fiar” FMA TIN nian iha tinan 25 ne’e. Ikusnian, nia agradese irmán sira ba Ispetoria ne’ebé loke odamatan misionária hodi hahú haruka irmán sira ba misaun ad gentes. Nia konvida atu ita husik Maria gia ita no kria korrente ida orasaun nian ba fekundidade vokasionál no apostólika-misionária.