Venilale – Kuarezma mak «tempu forte» ne’ebé prepara ba Páskua, tutun Tinan Litúrjiku nian no sarani ida-idak nia moris nian. Hanesan S. Paulo dehan, tempu ne’e mak « momentu favoravel» atu halo «dalan ida konversaun loos nian» (orasaun colecta kuarta cinzas) hodi enfrenta funu hasoru espíritu aat nian ho kilat sira peniténsia nian. Itineráriu loron haatnulu ne’ebé lori ita ba Tríduu Paskál, memória paixaun, mate no moris-hi’as Na’i nian, sentru mistériu salvasaun nian, mak tempu mudansa interiór no arrependimentu nian iha-ne’ebé «ema sarani simu bolun atu fila fali ba Maromak “ho fuan tomak” atu keta kontente ho moris medíokre ida», hanesan Amu-Papa fó hanoin iha Mensajen ba Kuarezma 2017.

Iha Kuarezma Kreda konvida ba jejún, esmola no orasaun. Komunidade S. Maria Mazzarello, FMA, edukadór/a sira no foin-sa’e sira halo itineráriu kuarezmál ne’e ho sinál sira-ne’e. Nune’e mak, ohin, 18 Marsu 2017, grupu sira ne’ebé eziste hanesan grupu Arte, Madre Mazzarello, Don Bosco, Laura Vicuña no grupu marianu hala’o atividade karidade nian iha área sira iha-ne’ebé identifika nu’udar periferia no iha ema ne’ebé presiza, mesak, moras, katuas no ferik sira. Fatin sira-ne’ebé ohin Irmán sira, edukadora no joven sira bá mak Lia-Oli, Ariana, Uaito-Bonu, Uatulia.

Iha sira-nia vizita eh asaun karidade ida-ne’e, sira buka liuliu ho sira-nia prezensa hamaluk uitoan maluk sira ne’e, hodi fahe ksolok no rona sira-nia istória, tulun sira se presiza hanesan bá kuru bee, haree se sira moras, reza ho sira hodi invoka Maromak nia prezensa no bensan ba sira-nia família no sira-nia moris.

Esperiénsia ne’e sai prova katak, bainhira ita fó ho ksolok ita mós haksolok… Família sira agradese tebes ba vizita ne’e… balun oferese manu-tolun, maibé foin-sa’e sira no Irmán sira dehan atu di’ak liu sira han atu hetan forsa… balun oferese ai-fuan hanesan ai-dila no goiava sira.

Maibé, buat furak liu mak halo tuir Amu-Papa nia liafuan no Mensajen ba Kuarezma 2017, atu haree katak “ema seluk mak don” ida, maski nia kiak liu karik bá, tanba maski iha vizita ne’e foin-sa’e sira la lori buat ida materiál, no ema ne’ebé ita vizita ema kiak materialmente, maibé ho asaun ne’e sira fahe ba malu prezensa ida, prezensa biin no maun-alin sira-nian, prezensa família nian nu’udar ema sarani ne’ebé hariku ita nia moris nu’udar ema.