Dili – Selebrasaun Pentekostes nian, ohin 19 Maiu, sai loron istóriku ba Inspetoria FMA TIN tanba ohin depoizde tinan 25 implantasaun fini karizma nian iha tinan 1988, ohin nia fó fuan ona: misionária na’in rua ba misaun ad gentes. Irmán Úrsula no irmán Fernanda, simu grasa vokasaun daruak, katak vokasaun misionária, hodi saran an ba Na’i nia bolun atu bá iha parte hotu mundu nian.

Durante selebrasaun, Amu Rodrigo hodi hakle’an kona-ba Espíritu Santu hateten katak, Espíritu mak hamosu hakaran Maromak nian, hakaran saran an nian iha vida konsagrada no nu’udar misionária; Espíritu Santu mak fó forsa, transforma. Nu’udar ezemplu ita husu tansá mak Apóstolu sira ne’ebé tau’uk ikusmai sai aten-barani hodi loke odamatan senákulu nian no sai hodi ko;alia nakloke kona-ba Jezús? Espíritu Santu mak fó kbiit ba mártir sira, ko’alia husi sira. Espíritu Santu mak santifika ita, harohan ih aita, hakonu ita ho esperansa.

Ba irmán Úrsula no Fernanda, Rodrigo husu atu sira husu Espíritu hela ho sira, hodi nakfilak, habiit no santifika sira nune’e mós ita hotu.Kreda nunka mesak, Insititutu nunka mesak, ita ida-idak nunka mesak… Espíritu Santu mak akompaña ita. “Kreda, Insitutu hakarak atu imi sai masin hodi fó sabór, sai naroman hodi lori Liafuan. Konteúdu la’ós imi-nia an, maibé Jezús mesak no ninia mensajen. Laiha buat seluk tan maibé Jezús de’it”.

Irmán Alaíde mós iha ninia liafuan sira, haksolok tebes tanba Institutu tau duni abut, sai ai-hun no iha sanak sira. Ohin sanak rua sei haketak an husi Inspetoria, atu bele multiplika tan iha fatin seluk mundu nian. Rekomendasaun importante ba FMA hotu mak iha paixaun boot ba Jezús Kristu nia Reinu, hodi sai uma nakloke ba orizonte luan liu no hakat liu limite sira rain rasik nian.