Maun no biin-alin doben sira, bondia!

Evanjellu domingu daruak Kuarezma nian aprezenta mai ita istória Transfigurasaun Jezús nian (kf Mt 17,1-9). Lori ketak apóstolu na’in tolu, Pedro, Tiago no João, sae ho sira iha foho aas ida, no iha ne’ebá akontese fenómenu singular ida-ne’e: Jezús nia oin «nabilan hanesan loron no ninia hatais sira sai mutin hanesan naroman» (v. 2). Ho modu ida-ne’e Na’i halo sai nabilan iha ninia an rasik glória Maromak nian ne’ebé ema bele kapta iha ninia pregasaun no iha ninia jestu milagrozu sira. No ho iha transfigurasaun akompaña, iha fohi, Moisés no Elias nia aparisaun, «ne’ebé ko’alia ho niai» (v. 3).

“Nabilan” ne’ebé kakrkateriza eventu estraordináriu ida-ne’e sai símbolu ba ninia finalidade: leno dixípulu sira nia neon no fuan atu sira bele komprende momoos sé mak sira-nia Mestre. Ne’e mak flash roman nian ida ne’ebé derepente loke Kristu nia mistériu no leno ninia an tomak no ninia morsi tomak.

Oras ne’e ho modu desizivu nia la’o ba Jerusalém, iha-ne’ebé nia tenke sofre kondenasaun ba mate hodi hedi iha krús, Jezús hakarak prepara ninia emar sira ba eskándalu ida-ne’e – eskándalu krús nian – ba eskándalu ne’ebé forte liu ba sira-nia fiar no, tempu hanesan, haklaken antes ninia moris-hi’as, hodi manifesta ninia an nu’udar Messias, Maromak nia Oan. No Jezús prepara sira ba momentu triste no terus wain. Defaktu, Jezús hatudu ba sira Messias ida oinseluk husi sira-nia espetativa, husi buat nee’bé sira imajina kona-ba Messias: la’ós liurai kbiit-na’in no gloriozu ida, maibé atan haraik-an no la defende an; la’ós na’I ho rikusoin boot, sinál bensan nian, maibé mane kiak ne’ebé la iha fatin ida atu sader enia ulun; la’ós patriarka ida ho bei-oan wain, maibé ida ne’ebé moris selibadu lahó uma no knuuk ida. Ne’e mak loos duni revelasaun ida ne’ebé kontráriu liu, sinál ida halo hakfodak tan eskándalu krús nian. Maibé liuhusi krús ne’e duni mak Jezús sei to’o iha moris-hi’as glória nian, ne’ebé sei sai definitivu, la’ós hanesan transfigurasaun ida-ne’e ne’ebé dura de’it momentu ida, instante ida.

Jezús nakfilak iha foho Tabor hakarak hatudu ba ninia dixípulu sira ninia glória la’ós atu evita sira liu husi krús, maibé atu indika krús lori ita bá iha-ne’ebé. Ema ne’ebé mate ho Kristu, ho Kristu sei moris hi’as. No krús mak odamatan ba moris-hi’as. Ema ne’ebé luta hamutuk ho Nia, ho Nia sei triunfa. Mensajen esperansa nian ida-ne’e mak soi iha Kristu nia krús, hodi konvida ba Fortaleza iha ita-nia ezisténsia. Krús srani la’ós movel ida uma nian eh ornament ida atu hatais, maibé krús sarani fó hanoin ba Kristu nia domin ne’ebé sakrifika an atu salva umanidade husi buat aat no husi salan. Iha tempu Kuarezma nian ne’e, ita kontmepla ho devosaun ilas krusifiksu nian, Jez’us iha krús: ne’e mak símbolu fiar sarani nian, emblema Jezús nian, mate no moris hi’as mai ita. Mai ita halo didi’ak atu Krús marka etapa sira ita-nia itinireráriu Kuarezma nian atu komprende ba beibeik salan nia aat no valór sakrifísiu ne’ebé Makso’ik halo atu salva ita hotu.

Virjen Santa ne’ebé hatene kontempla Jezús nia glória subar iha ninia umanidade, tulun ita atuhorik hamutukho Nia iha orasaun silensioza, atu ita husik ninia prezensa leno ita, atu lori iha fuan, liuhusi nakukun sira boot liu, reflesu ida ninia glória.