Fuiloro – Vizita madre provincial, Me. Alma Castagna iha komunidade Fuiloro, halao iha loron 03  fulan marsu to’o loron 10.Madre too iha komunidade kuaze tuku 04.15, iha ne’ebé madre no menina Kursu, menina ETA sira  hein ho ksolok boot atu fo bemvinda ba madre. Nudar bemvinda, menina sira simu madre hodi tebedai tuir lisan Lospalos nian, aleinde ida ne’e, iha mos kanta bemvinda nian no tuir fali menina no madre sira ho Madre provincial, hasae orasaun hamutuk iha kapela nudar símbolo agradese no hasae-an nian.

Iha loron tersa feira 07.03.2017 ne’e la hanesan bai-bain ne’ebé iha enkontru ba animadores husi centru Oratorio ida-idak ne’ebé hola parte iha Misaun Dom Bosco Fuiloro, tamba loron ne’e iha oras enkontru Animadores, iha Madre Provinsial ne’ebé fo nia tempu atu hasoru malu ho animadores sira. Madre nia prezensa no lia fuan sira halo animadores sira sente laran manas liu tan atu halao misaun ne’ebé sira simu; katak ba anima oratorianu sira. Iha okaziaun ne’e, Madre hatudu video badak “Pipper” ne’ebé koalia kona ba manu kiik ida ne’ebé halo esperiensia dahuluk atu buka hahan ba nia-an. Ho nia inan nia tulun no difikuldade ne’eb’e nia hasoru  halo nia deskobre rasik dalan oinsa atu hetan hahan ba nia-an no nia deskobre dalan foun atu hetan hahan barak liu tan ba sira seluk, liu husi nia aprende husi siput kiik oan ida. Nia hare kadiuk hoban an wainhira laloran mai, nia mos halo tuir. Ikus mai nia bele hare siput bo’ot sira nia subar fatin, ne’ebé halo nia hetan oportunidade atu ba foti sira fo ba manu sira seluk. Video ne’e tulun tebes animador sira atu la tauk iha oratorio, liu-liu ba animadores foun sira atu sai aten brani no kreativu liu tan iha ida-idak nia centru oratorio. Iha biban ne’e iha animador ida naran Deonato husu ba Madre: oinsa sai animador ne’ebé diak?, nune’e tuir madre nia resposta katak atu sai animador ne’ebé diak mak husi kiik kedas tuir ona oratorio nune’e bele hateke ba animador sira no iha hakarak atu sai hanesan sira, no madre hatutan tan katak animador foun presiza aprende barak husi animador tuan, pontu ikus nian mak animador presiza fo-aan tomak ba labarik sira. Atu taka  madre nia enkontru ho foinsa’e sira ne’e ikus madre hatutan tan katak: buat ne’ebé furak ba imi animador sira iha fuiloro mak tersa – tersa imi halibur hamutuk no prepara-an, ba atividade domingu nian, nune’e presiza loke-an no fo-aan tomak, prepara didiak katekese, jogos, atividade hotu, lori oratoriano sira iha imi nia fuan, presiza reza ba sira ne’ebé imi sei hasoru. Imi nia ksolok no laran manas la bele depende ba kuantidade, se sira mai nain 3 deit mos agradese, tanba ne’e prezente husi Maromak. Ikus liu wainhira remata enkontru ne’e madre fahe ba animadores sira imajen Beatu Paulo VI, amo ida Paulo VI mak ema ida ne’ebé iha fuan boot ba oratorio nia hadomi liu oratorio, hanesan ninia esperiensia nudar bispu iha Milano nia loke oratorio iha parokia sira no nia apresia liu salesianu sira. Iha orasaun iha imajen kotuk, madre dehan, atu reza ba Amo Papa Paulo VI atu tulun imi sai laran manas ba oratorio. Depois de Madre nia enkontru animadores sira kontinua hodi ba iha grupu ida-idak atu prepara sira nia atividade ba domingu nian.

Iha loron 08 kuinta, tuku 05.30, madre provincial hamutuk ho komunidade halao enkontru hamutuk ho komunidade edukativu, ne’ebé partisipa ,husi leigos familia rua. Iha enkontru ida ne’e aprezenta kona ba projetu komunidade nian.Aprezentasaun dahuluk husi Madre provincial, ne’ebé esplika oituan kona ba ninia prezensa durante vizita kanonik, no nia mensajen ba leigus sira mak : husu atu familia sira kolabora hamutuk ho irman sira, atu nune’e bele alkansa objetivu komunidade nian ba oin. Aleinde ida ne’e madre Sebastiana aprezenta mos projetu komunidade nian ba madre provincial, nune’e durante aprezentasaun ida ne’e, mosu kedas sujestaun balun husi madre provincial  no leigus sira, ne’ebé sujere kona ba, maneira/ meius oinsa fo katekese atu nune’e labarik sira keta baruk atu partisipa. Senhor Jacob sujere katak sebele katekese fo ho maneira hodi halo teatro ka kanta, jogus nst , no mos kona ba vizita ba familia kiak, ne’ebé tinan uluk la konsege realiza, no madre sira propoen nafatin ida ne’e, atu nune’e bele hakas-an no buka meio oinsa nune’e bele halao modalidade ida ne’e.

Madre nia vizita remata iha loron 10 fulan Marsu, nune’e iha dia 09 kalan,  hamutuk ho menina sira ami agradese ba madre provincial, ba nia vizita durante semana ida iha komunidade Fuiloro. Iha okaziaun ida ne’e menina sira espresa sira nia ksolok gratidaun nian ba madre liu husi sira nia kantiku no dansa sira.ikus nian remata ho boanoite ba menina sira. Iha madre nia boanoite, madre fo mensajen kona ba kanta ne’ebé menina sira aprezenta ( Perche la vostra gioia sia pena), hodi dehan katak kanta ne’e nia signifikadu mak “imi nia ksolok tenke nakonu, atu ema bele haree Jesus iha imi. Liu-liu iha imi nia apostuladu no imi nia moris loron –loron nian.

(Angelita Gomes)