Laga – Ohin irmán Alaíde husi Fuiloro hakat ba Laga atu vizita komunidade Laga no halo enkontru ho irmán juniora sira. Nia haksolok tebes hasoru foin-sa’e sira internadu no kursu profisionál nian nune’e mós labarik sira, hodi enkoraja sira valoriza oportunidade hotu. Ba foin-sa’e sira iha Fuiloro, ne’ebé aprezenta kanta no dansa kona-ba “uma ne’ebé evanjeliza”, nia konvida atu haree katak koléjiu, tuir Don Bosco mak uma ida.

Ba foin-sa’e sira Deretti rekomenda atu reza ba Maromak no husu sá loos ninia projetu ba sira, hodi husik madre sira akompaña sira iha dixernimentu vokasionál. Irmán Alaíde fó sujestaun atu menina sira forma grupu rua: ba vokasaun kaben no vokasaun relijioza.

 

To’o iha Laga, irmán Alaíde hanesan baibain hetan grupu oioin, liuliu Infãncia Missionária no orfan sira. Hotu tiha enkontru ho labarik sira, irmán Alaíde hasoru juinora sira no ko’alia ba sira kona-ba tema “Fihir metin ba Nia”. Nia konvida irmán foin-sa’e sira atu kuda serteza katak Maromak tau matan no hateke ba ita. Irmán Alaíde mós konvida sira atu hateke metin ba Jezús ho objetivu ida: persevera iha dalan.

Irmán Felizarda fahe nia esperiénsia dehan katak “atu ba oin presiza iha relasaun íntima ho Jezús liuhusi Eukaristia, Liafuan no sakramentu sira. Ohin loron mundu kria konfusaun, buka sobu ema nia ksolok…Maibé ba ema konsagrada ninia hateken ba diresaun ida de’it, ba Jezús”.

Ba irmán Miranda buat ne’ebé kona liu iha enkontru ne’e mak “oinsá enamora ka sai apaixonada ba Jezús. Nia dehan katak atu sai apaixonada ho Jezús presiza enkontru ho Nia loroloron no hadomi Nia. Enkonru kle’an ho Kristu mak bele fó fekundidade ba moris vokasaun nian, tahan fidelidade no fó forsa hasoru difikuldade sira”.

“Husi enkontru ne’e, iha buat tolu ne’ebé irmán Alaíde hateten no ha’u hanoin importante duni mak “paixaun atu sai dixípula, paixaun atu sai apóstola no misionária no paixaun ba Maromak nia Reinu”. Irmán Jacinta Guterres hateten.

Iha enkontru ne’e irmán Alaíde fó mós tempu atu haree filafali moris vokasaun saleziana no fahe reflesaun kona-ba saída mak nesesáriu liu atu kuda, habiit hodi fó kualidade ba vida relijioza.