Cailaco – Hodi hanoin komemorasaun ba Don Bosco loron ’28 de Fevereiro de 2017′ ami husi komunidade Beata Maria Romero Cailaco haksolok tebes simu ami nia superiora no vigária foun ne’ebé akompaña husi Madre Provinsiál Me. Alma Castagna fma, hamutuk ho Maun Aldo iha Cailaco. Superiora mak Madre Virgilia Freitas Marçal fma, no Vigária mak Madre Tania Aparecida Monteiro fma. Maski iha loron 28 ne’e simu ona superiora foun iha komunidade maibe ofisialmente foin anunsia iha  ‘7 de Março de 2017′. Tan ne’e ami hakarak dala ida tan fó Parabens no Obrigada ba madre Virgilia nia “Sim” ba knaar foun ida ne’e, ne’ebé bele gia no anima.

Nu’udar membru komunidade ami haksolok tebes ho ami-nia superiora foun. Mai ita entrega ba Na’i-Feto Auxiliadora nia liman knaar foun ida ne’e atu Nia kontinua hamahan madre Virgilia ho ninia tulun nune’e bele halao knaar foun ida ne’e ho domin no entuzizmu tuir espíritu S. João Bosco no Madre Mazzarello sira nia karizma.

Ami mós agradese Ir Tania (brazileira) ne’ebé fila hikas mai Timor nu’udar misionária, depoizde sai ba li’ur ba tinan rua atu halo formasaun. Molok ne’e nia servisu ona iha Timor husi tinan 2010, hodi halo esperiénsia misionária. Bentornata! “Parabéns e Boa missão!”

Komunidade Maria Romero, iha membru na’in haat no hala’o misaun hodi tulun parókia (katekeze, vizita família, grupu Infánsia Misionária), oratóriu festivu, promosaun feto nian, kursu inglés, nune’e mós tulun iha eskola sira.

(Elizita fma)