Venilale – Loron Internasionál Feto nian, tinan-tinan monu iha loron 8 Marsu. Loron ne’e dedika ba feto sira, atu hanoin husi parte ida konkista polítika, sosiál no ekonómika feto sira-nian, husi parte seluk diskriminasaun sira no violénsia ne’ebé feto sira sofre. Ita foti fali Roberto Bengni (ator italianu famozu ida) nia liafuan sira: “Imi atensaun tebes atu halo feto ida tanis, tanba Maromak sura ninia matan-been sira. Feto sai husi mane nia knosen, la’ós husi nia ain atu sama nia, la’ós mós husi ulun atu sai superiór liu nia; maibé husi nia sorin atu sira sai hanesan, uitoan iha liman nia okos, atu proteje nia, husi fuan sorin atu hadomi nia”.

Iha sosiedade ida ne’ebé mane mak domina hanesan ita-nian, di’ak tebes atu fó hanoin nafatin kona-ba igualdade dignidade no direitu entre ema, feto no mane. Defaktu, maski festa feto sira-nian, mane sira la hatene eh halo fudik la hatene, no la fó kumprimentus ba feto-oan sira iha ami-nia eskola. Se  ema seluk la selebra mai ita, feto sira, ita rasik selebra ba ita-nia an.

Tanba ne’e, ohin, menina sira koléjiu S. Maria Mazzarello selebra festa ne’e, uluknanai ho Missa, hodi agradese Maromak ba kmanek hotu nia halo iha kriatura feto hanesan Maria hananu iha ninia Magnificat; husi parte seluk hodi hanoin feto sira Bíblia nian, liuliu Testamentu Tuan nian, kona-ba sira nia moris, sira-nia luta, sira-nia kontribuisaun ba Povu Israel nia fundasaun, nia luta, nia identidade. Entre feto sira ne’ebé menina sira ba haree sira-nia moris hamutuk ho Irmán sira mak Sara no Agar, Rut no Noemia, Débora, Judit, Esther no Susana. Grupu ne’ebé aprezenta di’ak hetan prémiu no ba hotu-hotu, chocolate ida. Grupu ne’ebé hetan primeiru prémiu ba ninia aprezentasaun mak grupu Débora nian, grupu ho  klasifikasaun daruak mak grupu Susana no grupu ho klasifikasaun datoluk mak grupu ne’ebé aprezenta Ester.

Iha konkluzaun, hodi foti Primeira Dama Isabel Ferreira nia liafuan ita fó “parabéns ba loron ida ne’e, loron importante ba ita hotu atu selebra, i loron ida ne’e ita atu bele fó hanoin, ita nu’udar feto ita iha papél ida importante hanesan jerente no edukadora ida iha ita nia família no sosiedade no mós ita-nia nasaun. Tanba ne’e ba feto sira hotu iha Timor laran tomak, parabéns ba ita hotu ba loron ohin”.