“Durante loron haatnulu Kuarezma nian, ita sarani sira simu konvite atu uza Maromak nia Liafuan nia forsa iha funu espirituál hasoru Buat Aat”. Ne’e mak rekomendasaun Papa Francisco fó ba sarani sira iha domingu, 5 Marsu, domingu dahuluk Kuarezma nian.

Redasaun/RV – Amu-Papa komenta pasajen Evanjellu Mateus nian ne’ebé haktuir katak Jezús manán tentasaun sira ne’ebé Diabu halo ho Maromak nia Liafuan.

Iha okaziaun ne’ebá, Jezús enfrenta diabu “isin ho isin”. Tentasaun tolu Satanás nian atu koko impede Nia kumpre ninia misaun, Nia hatán ho Maromak nia Liafuan no ho forsa Espíritu Santu nian, hodi manán iha dezertu.

“Tanba ne’e, presiza koñese didi’ak, lee, medita no asimila Bíblia, basá Maromak nia Liafuan sempre atuál no efikás” nia hateten.

Bíblia hanesan ‘celular’

“Saida mak sei akontese se ita uza Bíblia hanesan ita uza ita-nia celular? Se ita lori nafatin nia (ka pelumenus Evanjellu ida iha bolsu), saida mak sei akontese? Se ita fila hikas bainhira ita haluha, se ita loke dala barak loron ida, se ita lee Maromak nia mensajen sira iha Bíblia hanesan ita lee mensajen sira iha ita-nia celular, saida mak sei akontese?. Ne’e mak komparasaun paradoksál ida, maibé halo atu ita hanoin.”

Amu-Papa kontinua hodi dehan katak se “ita iha” Maromak nia Liafuan nafatin iha fuan, la iha tentasaun ida mak bele “hadook” ita husi Maromak no la iha obstákulu ida bele desvia “ita” husi dalan di’ak nian.

“Ita sei hatene manán Buat Aat nia proposta sira ne’ebé iha ita-nia laran no iha ita-nia li’ur; no ita sei iha kapasidade atu moris moris ida moris-hi’as nian tuir Espíritu, hodi simu no hadomi maun-alin sira, liuliu sira ne’ebé fraku no kuran liu, inklui ita-nia funu-balu sira”.

Depoizde harohan Angelus no fó bensan ba sarani sira, Amu-Papa fó hanoin katak konversaun iha Kuarezma husu orasaun barak, jejún no obra karidade  nian. No atu remata, Amu-Papa husu atu harohan ba nia no ninia kolaboradór sira, ne’ebé durante semana ne’e hela iha Ariccia, atu halo Ezersísiu espirituál sira.

Durante períodu retiru Kuarezma nian, sei la iha audiénsia particular no jerál. Ezersísiu espirituál sei hala’o to’o loron 10 Marsu, no orienta hsui fransiskanu Giulio Michelini, kona-ba tema Jezús nia Paixaun, Mate no Moris-Hi’as.