Baucau – Hotu tiha vizita ba Kailako iha loromonu, ohin, 16 Maiu irmán Alaíde nakonu ho atividade: dadeersaan husi tuku 6.30 to’o tuku 9.30 iha komunida Eusebia Palomino (Dili), hafoin halo viajen mai lorosa’e, hahú ho vizita iha komunidade Baucau, hafoin hakat liu ba Venilale.

 

Iha fatin hotu nia bá, nafatin iha membru sira grupu Infância Missionária ne’ebé mai atu hasoru no fó benvinda. Iha nia vizita iha eskola Maria Auxiliadora irmán Alaíde ko’alia ba estudante sira hodi enkoraja sira iha sira nia dezempeñu atu hala’o knaar didi’ak hodi sai labarik di’ak. Nia dehan ba sira katak sira iha sorte boot tanba bele estuda iha fatin di’ak, enkuantu sira nia maluk balun iha rai Áfrika, fatin nia vizita estudante balun estuda iha ai-hun okos, balun estuda iha eskola ne’ebé la iha banku no meza. Irmán Alaíde dedika atensaun ba membru hotu komunidade edukativa, nune’e mós profesora no profesór sira.

Loron hanesan, husi tuku 1 to’o tuku 3.30 loraik nia iha Baucau. Iha nia liafuan ba irmán sira nia resalta katak “komunidade ne’e iha misaun espesiál: “aprende no hanorin”. Defaktu, komunidade ho membru na’in neen ne’e, na’in tolu hanorin iha eskola ESSA no na’in tolu estuda iha ICFP-Marista. Irmán Alaíde fó hanoin kona-ba Madre Mazzarello nia surat ne’ebé dehan atu bainhira estuda lian mundu nian, keta haluha lian klamar nian ho Maromak. Tuir irmán Alaíde, “se la iha ida-ne’e servisu bele halo di’ak, estudu bele halo di’ak maibé la halo diferensa ida iha sosiedade. Se ita la halo diferensa nu’udar FMA, ita la iha razaun atu eziste”. Nia hatutan tan katak “se karik ita sai mamuk iha vida espirituál, ita tenke asume fila fali vida konsagrada ne’ebé uluk ita promete ba nafatin publikamente”. Ida-ne’e implika, “ita moris vida komunidade no hola-parte nian, no tuir nia atu hola parte ita-nia konstituisan fó hanoin atitude ‘vado io’ nian”, irmán Alaíde hateten.

“Ita la’ós feto de’it no solteirona sira. Ita feto konsagrada no ita iha espozu ida ne’ebé ita hela hamutuk loron ba loron… Se ita hela hamutuk ho nia maibé la iha enkontru kle’an ho espozu, ita hanesan hela iha otél de’it. Vida komunitária importante nune’e mós fraternidade no orasaun. Se ita la iha espiritualidade kle’an ita sai mamuk… Ita hela iha kongregasaun no iha hola-parte jurídika maibé la iha hola-parte vitál”, irmán Alaíde destaka.

Hatene katak iha Baucau iha foin-sa’e barak, nia mós enkoraja sira atu sai pontu referénsia, sai adulta konsagrada ne’ebé ko’alia ho moris ba foin-sa’e sira no “dada sira atu tuir Jezús iha dalan oioin”.

Ikusnian, nia konvida irmán sira hotu atu “tama iha eskola Mestre nian, eskola dixipuladu nian. Aprende sai dixípulu atu sai misionária, ohin kedas, atu la lakon tempu”.

Konvite ba ita hotu atu halo matríkula iha Jezús nia eskola hodu hela iha nia ain okos atu aprende husi nia oinsá sai misionária laran-di’ak nian, domin nian, misionária ne’ebé besik ba maluk sira no haklaken ho moris Maromak nia domin ba ema hotu.