Iha Domingu II Kuarezma nian Maromak nia Liafuan define dalan ne’ebé dixípulu loos tenke tuir: dalan rona ho atensaun, obediénsia totál no radikál ba Maromak nia projetu no planu sira.

Evanjellu relata Jezús nia tranzfigurasaun. Hodi foti elementu simbóliku Testamentu Tuan nian, autór aprezenta mai ita katekeze ida kona-ba Jezús, Oan ne’ebé Maromak hadomi. Nia mak sei konkretiza Aman nia projetu libertadór ba ema sira liuhusi nia moris. Ba dixípulu sira ne’ebé dezanimadu no ta’uk, Jezús dehan: dalan saran moris nian la lori ba frakasu, maibé ba moris nakonu no definitivu. Imi mós tuir nia bá.

Iha leitura dahuluk aprezenta figura Abraão nian. Abraão mak ema fiar nian, ne’ebé moris hodi rona Maromak ho konstánsia, hatene lee Ninia sinál sira, aseita Maromak nia apelu sira no hatán ho obediénsia totál no entrega an iha konfiansa. Iha perspetiva ida-ne’e, nia sai modelu fiar-na’in nian ne’ebé haree Maromak nia projetu no tuir ho fuan tomak.

Iha leitura daruak, ita hetan apelu ida ba Jezús nia dixípulu sira, atu sira haka’as an atu tuir no sai sasin koerente Maromak nia projetu nian iha mundu. Laiha buat ida – nein ta’uk ne’in komodizmu no instalasaun – bele hasai Jezús nia dixípulu husi responsabilidade ne’e.

Download