Venilale – Iha programasaun komunidade St. Maria Mazzarello (Venilale) ba 2017, dalan ne’ebé komunidade edukativa hakarak fó kontinuidade mak hala’o hanorin sira iha Papa Francisco nia ensíklika Laudato Sí, kona-ba kuidadu eh tau matan ba ita-nia uma komún. Amu-Papa hateten katak “bolun urjente atu proteje ita-nia uma komún inklui preokupasaun atu lori família umana tomak atu buka dezenvolvimentu sustentavel no integrál, basá ita hatene katak sasán bele muda” (LS 13).

Atividade sira kona-ba ekolojia integrál ne’ebé programa ona mak kuda ai-hun oan sira, hanorin resiklajen no sensibiliza ba moris iha ambiente moos hodi la soe foer arbiru no halo limpeza.

Atu bele implementa atividade ida-ne’e, komunidade edukativa St. Maria Mazzarello Venilale, halo aprosimasaun ba autoridade lokál sira husi administradór postu Venilale, ne’ebéko ntaktu xefe-suku sira ne’ebé iha interese atu halo “greening” ba sira-nia fatin. Suku rua ne’ebé iha interese mak Uatu-Lia no Uatu-Haco. Husi ne’e mak komunidade edukativa, liuliu diresaun Escola Técnico-Vocacional Hotelaria e Turismo, St. Maria Mazzarello nian, hahú halo enkontru dala rua ho autoridade suku rua ne’e nian no deside fatin sira atu ba kuda no totál ai-hun ne’ebé presiza.

Programa ne’e hetan apoiu tomak husi Ministériu Agrikultura no Peskas (MAP) no ninia departementu florestrál, ne’ebé husi ninia parte hetan apoiu husi organizasaun Alemaña “Deutshe Gesellschaft für Internationale Zusammenarbeit” (GIZ) ne’ebé oferese ai-oan sira no mós apoiu ba lojístika, basá tuir Sr. Fernando Soares, Governu la iha osan atu bele hala’o programa reflorestrasaun ba Timor tomak, bá Baucau de’it mós labele.

Nune’e atividade ohin, 4 Marsu kuda ai-hun rihun rua (2.000) iha aldeia Uaito-Bonu, suku Uatu-Lia, Venilale, hetan susesu tanba kooperasaun eh serbisu rede ho Governu, NGO, populasaun no Instituisaun eskolár. Prezente iha atividade kuda ai-oan ne’e rai-na’in sira fatin kuda nian, tanba sira oferese rai no sira mak sei tau matan depoizde kuda, Diretór Rejionál MAP nian, Sr. Fernando Soares; Sra Isabel Pereira, asesora ba GIZ Timor-Leste; xefe suku Uatu-Lia Sr. Angelino Moisés Pereira, xefe aldeia Uaito-Bonu, Sr José Ximenes, Pe Abraão SDB, Diretór Eskola balun iha Venilale, no autoridade husi sub-distritu sira. Serimónia hahú ho benvinda ba bainaka husi MAP no husi GIZ, lia-menon sira, snack, hafoin abertura kuda.

Tuir xefe aldeia Uatu-Lia, Sr. Angelino, sira hili atu kuda ai-oan iha ne’e tanba erozaun ne’ebé akontese nafatin iha fatin ne’e, no erozaun ne’e iha impaktu ba mota Seisal nia ikun no área sira Laga nian. Nune’e mak presiza tau matan ba mota Seisal nia ulun atu evita estragu eh bee lori rai iha Mota Seisal nia ikun.

Molok kuda, tékniku sira husi MAP hanorin no halo uluk demonstrasaun oinsá kuda fini ai-oan sira: presiza fó distánsia metru tolu ba ai-hun ida-idak; bainhira kuda, tau uluk ba rai-kuak ‘top-soil’ ne’ebé riku ho estrume; loke plástiku didi’ak, atu keta hasai nia abut sira no rai kontinua belit ba ai-abut; kuak labele naruk demais, selae ita la’ós kuda ai maibé hakoi ai-oan; kuda tiha tau sinál katak kuda ona, hodi tau ai-tonka ne’ebé kesi ho plástiku metan uza atu hakiak fini.

Estudante sira, profesór/a sira, Irmán FMA sira, tékniku sira, bainaka sira, autoridade lokál no populasaun sira, hotu-hotu kolabora no serbisu hamutuk atu kuda ai-oan, no agradese mós ba Maromak ne’ebé haraik tempu di’ak (la udan maibé la iha loron manas mós) atu ema bele kolabora ho Na’i kriasaun nian no hala’o knaar atu tau-matan ba Rai ne’e.

Remata tiha kuda ai-hun, hotu-hotu halo almosu hamutuk iha área Uaito-Bonu, ho hahán prepara husi ETV St. Maria Mazzarello ho suporta husi MAP no GIZ.

Laudato Si mi Signore!!!