Kailako (Maliana) – Ohin 15 Maiu, irmán Alaide halo nia vizita animasaun misionária ba parte loromonu Timor-Leste nian, iha ne’ebé FMA sira iha prezensa ida iha Kailako, Maliana. Molok hakata liu ba Kailako, irmán Alaide, ne’ebé akompaña husi irmán Paola, irmán Marivic no irmán Jacinta, hakat ba uluk hasoru Dom Norberto, Bispu Dioseze Maliana nian, iha ninia servisu-fatin. Iha sira-nia dala-lia, irmán Alaide husu sá de’it dezafiu ne’ebé dioseze enfrenta. Dom Norberto hateten katak iha Maliana presiza buat hotu, hahú husi infrastrutura (la iha katedrál, rezidénsia, servisu-fatin…), pesoál ka rekussu umanu sira, dezafiu evanjelizasaun no re-evanjelizasaun nian, dezafiu husi seita sira, ne’ebé maioria mai husi Brazíl.

 

Irmán Alaide hateten katak, seita iha Brazíl tama husi EUA, no sira iha osan barak no foti mós osan barak husi adeptu sira ho promesa katak “hetok fó osan barak liu hetok hetan grasa barak liután”. Irmán Alaide mós dehan katak, seita sira ne’e baibain buka fatin sira funu nian ka foin remata funu no fatin sira be fiar fraku ka lahó afirmasaun identidade relijioza maka’as. Tuir nia, tu enfrenta seita sira, presiza forma komunidade sarani baze ne’ebé forte no metin iha sira-nia fiar. Ida-ne’e bele halo ho relijiozu/a sira ne’ebé oras ne’e iha prezensa relijiozu/a sira-nian ne’ebé ho diversidade karizma nian no servisu iha konjuntu, to’o iha baze hodi marka prezensa signifikativa, sasin no partilla fiar nian.

Hafoin irmán Alaide kontinua ba Kailako, iha-ne’ebé irmán sira, oratorianu sira, Infãncia Missionária no ADMA sira hein ona atu fó benvinda. Ko’alia ba foin-sa’e sira no ba ADMA, nia husu sira atu sai misionária tuir Maria nia ain-fatin, misionária dahuluk ne’ebé lori Jezús iha nia fuan hodi fahe ba nia prima Izabél. Atu halo nune’e, presiza husik Maria hanorin ita, hodi haburas domin ba Na’i-Feto Ausiliadora, no barani lori ba ema seluk Jezús.

Iha loraik, tuku 2.30, irmán Alaide ba iha eskola agríkola, fatin irmán sira tulun iha ensinu. Foin-sa’e 259 hein hodi simu nia ho mestre rumane’ebé membru ADMA nian. Nia haksolok tebes bele hasoru sira, hodi hameno ba sira atu aproveita didi’ak tempu formasaun nian atu hakonu sira-nia an ho valór no matenek, nune’e bele sai sarani di’ak no sidadaun onestu, hodi harii futuru ne’ebé furak no di’ak.