Venilale – Ba dala rua ona mak komunidade  Maria Mazzarello Venilale, halo formasuan kona-ba liturjia, liuliu kona-ba Eukaristia/Santa Missa ba estudante sira ETV nian. Ida-ne’e tanba objetivu ida komunidade nian mak fó kualidade ba vida orasaun no oferese esperiénsia orasaun nian.

Formasaun ne’e, Ir Jacinta Gusmão mak fasilita, no hala’o sábadu dahuluk fulan-fulan eh ohin iha sesta, tanba aproveita loron feriadu (loron Veteranos nian) no tanba aban sei iha atividade ekolojia ne’ebé ETV sei hala’o ho populasaun Venilale.

Iha enkontru dahuluk, foin-sa’e sira simu introdusaun kona-ba saida mak liturjia no sá loos mak la’ós liturjia. Hafoin halo diferensa entre kultu ne’ebé halo ba Maromak, ba Na’i-Feto no ba Santu sira.

Latria (husi lia-gregu λατρεια, “latreuo” ne’ebé signifika ‘”adora”), mak liafuan teolójiku ida Kreda Katólika no Ortodoxa uza ne’ebé signifika kultu adorasaun nian ne’ebé tenki fó de’it ba Maromak, eh ba Santíssima Trindade.

Iperdulia (husi lia-gregu υπερδουλεια) mak liafuan teolójiku iha Kreda Katólika no Ortodoxa ne’ebé signifika onra boot no kultu venerasaun espesiál devotu sira-nian ba Na’i-Feto. Venerasaun espesiál ne’e labele konfundi ho idolatria.

Iha kristianizmu, dulia (husi lia-gregu δουλεια, “douleuo” ne’ebé signifika “onra”), mak liafuan teolójiku ne’ebé signifika onra no kultu venerasaun ba santu sira. Onra diferente husi adora; ema ne’ebé dehan onra hafoin iha prátika adora, nia laloos.

Ohin fali sira hahú ho atividade puzzle kona-ba parte sira Missa nian. Estudante sira fahe tiha ba grupu 15 no ida-idak buka kompleta puzzle ne’e. Grupu ne’ebé aserta kedas lalais mak grupu 3. Kompleta tiha puzzle. Ir Jacinta fó hanoin fali ba sira kona-ba Missa nia parte haat: Ritu hahú nian, litujia Liafuan nian, liturjia eukarístika no ritu ikus nian. Parte prinsipál sira mak liturjia Liafuan nian no liturjia eukarístika.

Elementu prátiku sira ne’ebé hato’o ba estudante sira mak ezortasaun katak ita ba Missa atu harohan, atu hasoru malu ho Maromak, la’ós atu bá haree espetákulu. Nune’e, presiza ita-nia partisipasaun ativa iha orasaun, hananu no hatán; partisipa liuhusi jestu sira ne’ebé hatudu adorasaun, respeitu ka venerasaun, rona, silénsiu, dignidade kultu ne’e nian. Hafoin nia mós fó hanoin kona-ba knaar sira leitór eh leitora nian no oinsá halo leitura. Lee ho di’ak, hosi projeta didi’ak lian no pronunsia loloos, tanba haklaken Maromak nia Liafuan, no molok lee venia ba Missal ka leccionario, no lee hotu tiha halo tan venia.

Formasaun remata ho selebrasaun eukarístika, nune’e bele kedas tau iha prátika buat ne’ebé foin rona.