Dili – Irmán Alaide halo daudaun nia vizita animasaun misionária, no iha loron rua de’it nia laran nia la kole atu hato’o katak dimensaun misionária mak DNA Institutu FMA nian. Liu de’it tinan lima fundasaun FMA nian iha Agostu 1872, Don Bosco no Madre Mazzarello haruka kedas irmán sira ba espedisaun misionária hakat liu Europa, iha tinan 1877. Irmán Alaide mós salienta katak, Konstituisaun FMA nian ko’alia kona-ba misionariedade iha kedas artigu sanulu-resin-tolu nia laran.

 

Loos duni, Don Bosco hakarak ita serbisu ba Maromak nia glória no ba foin-sa’e sira nia salvasaun iha parte hotu mundu nian. Iha nia mehi misionáriu dalimak no ikus, ida iha 1886, Don Bosco “haree” dezenvolvimentu misionáriu ninia kongregasaun nian ne’ebé foin moris. Bibi-atan feto-raan ida konvida nia atu hateke ba orizonte no haree prezensa saleziana iha mundu tomak no atraversa kontinente sira Ázia, Áfrika no Amérika. Don Bosco mehi ita-nia prezensa iha kontinente hotu mundu nian. Nune’e, ita presiza konsolida ita-nia an hodi hateke ba futuru no mundu, hodi loke ita-nia odamatan ba mundu, hodi saran ita-nia moris. “Se irmán dahuluk sira la sai ba mundu tomak, karik karizma mate iha Mornese. Ita fó ita sei simu liután”, salienta irmán Alaide. Iha ninia partilla nia fahe kona-ba Madre Jerál ne’ebé husu ba irmán sira: “iha sé nia liman mak ita halo votus sira?”. “Ita halo votus ba Superiora Jerál, nune’e, nia iha direitu hotu atu haruka ita ba parte naran de’it mundu nian, tanba mundu mak ita-nia uma”, nia hatutan. Iha

Irmán Alaide iha kedas horisehik hahú ona nia enkontru ho irmán sira konsellu inspetoriál. Ohin ho diretora sira komunidade iha dadeer, no loraik ho misionária sira, hamutuk na’in 11 ne’ebé oras-ne’e prezente iha inspetoria TIN. Iha enkontru hotu ne’ebé hala’o ona, nia nafatin lori irmán sira atu reflete no fahe kona-ba sira-nia esperiénsia hodi haree difikuldade no esperansa sira, nune’e mós mehi sira ne’ebé ita iha nu’udar FMA.

Tuir irmán Alaide, importante mak hateke ho realizmu ba moris no la para iha difikuldade sira, maibé, halo sira sai oportunidade kreximentu nian hodi haburas nafatin domin primeiru ne’ebé ita iha ba Jezús no ba foin-sa’e sira, hodi buras iha dixipuladu no misionariedade: paixaun ba Maromak atu iha paixaun ba foin-sa’e sira. Tan ne’e nia, hahú husi partilla irmán sira-nian fahe ninia hanoin no esperiénsia sira. Nia salienta maka’as katak, iha difikuldade no diversidade sira kultura nian, kultura karizmátika mak tenke halo ita sai ida.

Ba servisu hotu obediénsia husu ita, Jezús mak ita-nia modelu. Iha nia enkontru ho diretora sira nia aprezenta íkone “fase ain nian” ne’ebé João haktuir iha ninia Evanjellu. Ita simu bolun atu hakruuk no serví hodi fase ita-nia maluk sira nia ain. Pasajen fase ain nian hatudu atitude loos servisu animasaun nian no rekoñese katak ita la’ós ita mak lialoos nia na’in.