Dili – Solenidade Madre Mazzarello nian espesiál liu. Inspetoria TIN haksolok atu selebra hamutuk ho irmán Alaide no Família Saleziana besik na’in 300 (foin-sa’e sira, oratorianu sira, FMA, SDB na’in tolu reprezenta komunidade tolu iha Dili, formande, ADMA, Kooperadór Salezianu/a, antiga/u aluna/u sira…) ne’ebé halibur iha Centro de Formação João Paulo II .

Selebrasaun nia sentru mak Eukaristia selebra husi prezide husi padre Apolinário Neto, vigáriu provinsiál no konselebra husi padre Manuel Pinto no padre Nelson Goncalves S. Padre Apolinário iha ninia omilia, aprezenta uitoan Madre Mazzarello nia moris no ninia domin ba Jezús no ba foin-sa’e sira, hahú husi janela ninia adolexénsia nian, janela Valponasca nian, to’o sai membru grupu Imakulada nian no ikusmai adere ba Don Bosco nia mehi atu realiza Maromak nia projetu salvasaun nian ba parte feto-raan sira.

Solenidade ne’e sai espesiál mós tanba ohin hahú selebrasaun tinan 25 prezensa FMA, ho peregrinasaun ilas Maria Ausiliadora nian ba komunida FMA hotu, ilas ida ne’ebé uluk mai hamutuk ho misionária na’in tolu pioneira sira iha Venilale, Timór. Peregrinasaun ne’e sei remata iha fulan Setembru iha Venilale, fatin prezensa FMA dahuluk.

Molok hahú prosisaun Na’i-Feto Ausiliadora ne’ebé ohin, hahú nia vizita iha komunidade S.José, Novisiadu, irmán Alaide hato’o nia lia-menon ba Família Saleziana tomak halibur ba eventu ne’e.

Tuirmai ne’e nia liafuan sira:

“Ha’u haksolok tebes atu vizita Timór iha okaziaun tinan 25 prezensa FMA nian. Ha’u kontente bele partisipa iha selebrasaun eukarístika ne’ebé vigáriu provinsiál selebra hamutuk ho “irmão” salezianu na’in rua. Ha’u haksolok mós atu hatene katak iha ne’e, iha ita-nia enkontru iha prezidente nasionál Eis-alunu sira nian, prezidente Eis-aluna sira nian, reprezentante Salezianu Kooperadór sira nian, prezidente ADMA nian no Família Saleziana tomak: padre salezianu sira, irmán saleziana sira, ADMA, Eis-aluna sira, Eis-alunu sira, Salezianu Kooperadór no ita hotu ne’ebé iha-ne’e hola parte ba família boot ne’ebé Don Bosco mehi, hadomi no hahú no Madre Mazzarello asume.

Ohin iha festa Madre Mazzarello nian, hodi fó kontinuidade ba festa sira tinan 25 prezensa irmán saleziana sira-nian iha Timór, ha’u hakarak halo auguriu ida ba Família Saleziana.

Ida uluk nian mak ne’e: atu ita sai feto na mane sira dixípula no dixípulu Na’i nian; atu ita loos duni bele haklaken buat ruma ba juventude no ema seluk hahú husi ita-nia esperiénsia enkontru nian ho Na’i: enkontru ho Liafuan, enkontru ho Eukaristia, enkontru ho Na’i prezente iha istória, iha realidade, iha família sira, iha biin-alin no maun-alin sira… Sai mane no feto dixípulu sira Na’i nian mak konvite dahuluk ba Família Saleziana. Atu ita bele haklaken buat ruma hahú testemuñu ita-nia moris nian no husi ita-nia esperiénsia enkontru nian ho Na’i.

Augúriu daruak: atu ita sai Família Saleziana ida iha-ne’e, iha Timór ne’e, loos duni sai família ida unida, família ida ne’ebé moris komuñaun ne’ebé bele fó sasin loos fraternidade nian, solidariedade nian, ksolok no esperansa nian tanba sai kontinuasaun ba Don Bosco nia hanoin no karizma. Sai família unida ne’ebé moris iha komuñaun!

Augúriu datoluk: atu ita sai Família Saleziana ida ne’ebé lori iha fuan paixaun ida, paixaun ba Maromak nia Reinu. Ida-ne’e mak paixaun Don Bosco no Madre Mazzarello nian, paixaun da mihi animas cetera tolle… fó mai ha’u moris sira no buat seluk hela ba imi,  restu sira. Paixaun ema ida nian ne’ebé lori iha fuan ahi boot misionáriu ne’ebé lori vida ba ema hotu, atu foin-sa’e sira bele iha esperansa futuru ida di’ak liu, futuru ida ne’ebé sira bele mehi, no sira bele fó kontribuisaun atu sosiedade mundu nian sai umanu liután, sai fraternu liután, sai solidáriu liután. Ne’e mak razaun moris nian ba Família Saleziana. Liuhusi moris rasik, liuhusi hela hamutuk, nsieme, hamutuk, no liuhusi asaun-misaun rasik bele fó kontributu atu halo sosiedade iha Timór di’ak liu, umana liután, fraterna liután, solidária liután. Atu ema hotu ohin bele moris ho dignidade: ida-ne’e mak Don Bosco mehi. Atu prezensa Família Saleziana nian bele fó mensajen ida moris nian no tulun nakfilak sosiedade, hahú hodi nakfilak fuan rasik, hodi husik atu evanjeliza uluk fuan rasik nune’e bele evanjeliza nasaun rasik nia fuan no liuhusi nasaun leno mundu.

Augúriu ne’e mak ha’u hakarak ba imi ho Don Bosco no Maria Ausiliadora nia bensan.

Obrigada barak!”