Iha Misa Domingu nian horisehik, 12 Maiu, iha Prasa S. Pedro, Papa Francisco kanoniza mártir 800 husi Oltranto ne’ebé ema Turku sira oho; irmán María Laura Montoya Upegui, santa kolombiana dahuluk, mestra no evanjelizadora ema kiak no rai-na’in sira nian; irmán Sister María Guadalupe García Zavala, apóstola mexikana ba ema kiak no moras sira. Martíriu non misaun mai hotu husi Maromak nia domin no esprime liuhusi sasin karidade nia.

 

Sidade Vaticano –Papa Francisco fó hanoin ohin iha Vaticano kona-ba kristaun sira ne’ebé hetan persegisaun tanba  sira-nia fiar no husu “aten-barani” atu evita “fuan sai toos”.

[Asesu omilia tomak ho lia-portugés]

“Ita husu ba Maromak atu tahan kristaun barak ne’ebé, iha tempu ne’e no iha parte barak mundu nian, sei sofre persegisaun no haraik ba sira aten-barani atu sai fiél no hatán ba aat ho di’ak”, nia dehan, iha ominila ba selebrasaun dahuluk kanonizasaun nian pontifikadu atuál, iha Prasa S. Pedro.

Iha ema rihun ba rihun nia oin, Papa  fó hanoin kona-ba italianu Antonio Primaldo, ne’ebé hetan kanonizasaun hamutuk ho maluk leigu na’in 800, sira hotu ema oho tanba “lakohi renega sira-nia fiar rasik” iha 13 Agosto 1480, iha sidade Otranto, durante invazaun husi tropa Túrkia nian.

“Fiar halo ita haree hakat liu ita nia hateken umanu nia limite, hakat liu ba moris rohan-laek”, Amu-Papa salienta.

Francisco ko’alia mós kona-ba santa foun na’in rua, santa kolombiana Laura de Santa Catarina de Sena (1874-1949), katólika dahuluk aís nian atu hetan kanonizasaun no mexikana Maria Guadalupe (1878-1963), ne’ebé partisipa atu harii Kongregasaun “Servas de Santa Margarida Maria e dos Pobres”.

Tuir Amu-Papa, santa relijioza sira-ne’e nia ezemplu hanorin ita atu “manán indiferensa no individualizmu” ne’ebé halo dodok “komunidade kristán sira” no ema ida-idak nia fuan, atu simu “lahó prekonseitu hotu no lahó retisénsia, ho domin auténtiku”.

“Buat folin liu ne’ebé ita soi mak Kristu no ninia Evanjellu”, nia observa, iha intervensaun ida ho italianu no españól.

Ritu kanoniazasaun nian hahú iha inísiu selebrasaun nian, ho intervensaun husi kardeál Angelo Amato, prefeitu Kongregasaun ba Kauza Santu sira-nian. inskrisaun beatu sira-nia iha “álbum Santu sira-nian”, husi Amu-Papa nia parte, no kolokasaun relikísa sira-nia iha altár leten.

Iha omilia, Francisco konvida partisipante sira atu rai metin fiar ne’ebé sira simu, “inklui iha obstákulu no inkomprensaun nia klaran”, no defende katak lahó “sasin karidade” nian, martíriu rasik no misaun lakon nia “sabór kristaun”.

Papa Francisco ko’alia kona-ba Santa Laura Montoya nu’udar “inan espirituál rai-na’in” sira-nian” iha Colombia, ho “pedagojia efikás ida ne’ebé respeita sira-nia kultura“.

“Santa dahuluk ida-ne’e be moris iha rai kolombiana ne’ebé furak, hanorin ita atu sai laran luak ho Maromak, atu keta moris fiar mesa-mesak – hanesan fali ema bele moris fiar ho modu izoladu – maibé, komunika nia”, Amu-Papa hatutan tan.

Kona-ba Santa Guadalupe García Zavala, ‘Madre Lupita’, Francisco hahí nia tanba nia ne’ebé hewai hodi husik “moris kómodu” no ninia asaun ba “ema kiak sira, ema moras sira, ema marjinalizadu sira, ema abandonadu sira” ne’ebé sai “Kristu nia isin”.

“Santa mexikana foun ne’e konvida ita atu hadomi Jezús no ida-ne’e implika keta taka ita-nia an rasik, iha problema rasik, iha ideia rasik, iha interese rasik, maibé sai no bá hasoru sira ne’ebé iha nesesidade atensaun nian, komprensaun nian no tulun nian”, nia destaka.

Papa Francisco konklui ho apelu ba “fidelidade ba Jezús Kristu no ninia Evanjellu, atu haklaken nia ho liafuan no ho moris, hosi fó sasin kona-ba Maromak nia domin”.

Molok remata misa iha orasaun Regiana Coeli aleinde kumprimenta pergrinu sira, nia konvida atu defende moris hahú husi iha knotak laran, hodi fó ánimu ba grupu “Marcia per la Vita” atu kontinua mantein ema hotu nia atensaun ba tema importante ne’e: “Momentu partikulár ida ba sira ne’ebé iha atensaun boot ba defeza vida nia sakralidade mak “Loron Evangelium Vitae” ne’ebé sei realiza iha Vaticano ne’e, iha kontestu Tinan Fiar nian, loron 15 no 16 Juñu ne’ebé mai” .