Fuiluro – Loron 18 fevereiru 2017, sábadu foin lalais ne’e, iha Centru Formasaun Morano Larimaka, konvoka enkontru ida ho inan aman sira, husi Eskola Tecníca Agricóla  ( ETA ) nian no menina sira ne’ebé tuir kursu iha sentru Formasaun Morano. iha enkontru ida ne’e akresenta kona ba regulamentu kolejiu nian no regulamentu sira kona ba kursu no estajiu. Partisipante ba enkontru ida ne’e mak inan, aman, maun no bin sira, sira ne’ebé prezente iha enkontru ne’e mais ou menus 120  pessoas. Soru motu ida ne’e hahu iha tuku 9.30, maibe molok hahu tiha ona ho rejistrasaun.

Enkontru ida ne’e hahu ho liafuan benvinda husi Me. Diretora komunidade nian, Me. Sebastiana Soares, FMA, hodi agradese ba prezensa inan, aman sira iha enkontru ida ne’e. Hafoin aprezenta ba inan aman irman ida-idak ne’ebé tau matan ba menina sira, nia pozisaun no knar sira.Ba sira nia kolaborasaun, suporta no diak tomak Madre diretora hato’o agradese. Hafoin de liafuan benvindu nian, tuir kedas ho orasaun ne’ebé preside husi Madre Leonilde Monteiro, FMA. Hotu tiha orasaun Madre Sebastiana aprezenta kedas regulamentu kolejiu nian ba inan aman sira, hodi esplika Pontus- Pontus iha regulamentu nia laran ne’ebé iha hahalok disiplina, hahalok proibidu no sansaun sira. Depois de Madre Sebastiana remata tiha ninia apresentasaun, kontinua kedas ho madre Leonilde ne’ebé aprezenta kona ba regulamentu eskola, kursu no estajiu nian, iha regulamentu ne’e nia laran iha mos hahalok disiplina, hahalok proibido  no sansaun sira. Wainhira remata tiha sira nia aprezentasaun fo mos oportunidade ba inan Aman sira atu hato’o sira nia sujestaun, perguntas sira kona ba regulamentu. Reprezentante  senhora ida. sra, Laurinda ne’ebé fo nia hanoin kona ba oan sira nia prezensa iha familia  ne’ebé mate, tuir nia katak: “se diak liu oan sira nia prezensa loron ida deit naton ona, sira iha ka laiha mos ema ne’e mate ona, buat ne’ebé importante mak sira reza, husu missa no kontinua sira  nia estudu. Tuir fila fali iha mos chefe husi Mehara Senhor Jimy ne’ebé fo nia hanoin katak: “ kona ba estajiu, dalaruma oan sira dehan iha fatin serbisu nian, maibe dalaruma sira iha fali fatin seluk, nune’e presiza fo sansaun. Madre Sebastiana nia hanoin kona perguntas sira ne’e, parte dahuluk madre akresenta katak ladun diak se familia mate sira la ba, orsida sira la konsentrasi iha lisaun, maibe ita haree ba tradisaun Madre konkorda ho senhora nia hanoin atu lalika hela kleur. Hodi hatan ba Senhor Jimy nia perguntas Me. Leonilde dehan katak: normalmente sentru prepara karta no husu, hasoru DG hodi haree hamutuk kona regulamentu sira no Madre nafatin komunika ba estajiaria sira, liu-liu ba chefe grupo nian, hodi hatene sira nia atividade  loron nian no nia hatutan tan katak familia preukupa ba oan sira ne’e diak maibe preukupa liu lalika, tanba fulan rua estajiu ne’e husi Sentru sei tuir didiak estajiaria sira. Aleinde sesaun primeiru, iha tan sesaun segundu kona ba perguntas no sujestaun, depois remata tiha segundu sesaun. Ikus nian Madre diretora  remata nia enkontru ne’e, hodi hato’o obrigado barak ba inan aman sira ba prezensa. Tanba domin boot ba oan sira, nune’e madre apresia tebes ho sira nia prezensa, no nia hatutan tan katak: “ami iha Maromak  ne’ebé tulun ami, atu guia menina sira, se menina sira iha hakarak atu sai diak, Don Bosco no Madre Mazarello hakarak ami tau matan, fo ami nia moris atu tulun foinsa’e sira, ami fo razaun ba buat ne’ebé sira halo. Ita boot sira nia suporta atu tulun ami nune’e ita bele lao hamutuk hodi dudu/ suporta foinsa’e sira  ne’e ba oin. Ami reza tersu no misa hamutuk, laos katal sira hotu atu sai Madre, imi lakon karau maibe se ita bo’ot sira fo ba Maromak, Maromak sei haraik grasa wain ba Ita boot sira”. Ida ne’e mak lia menon ikus ne’ebé hato’o husi Madre diretora, hotu tiha ida ne’e inan Aman sira asina hamutuk regulamentu, iha hasai foto hamutuk, han meiodia hamutuk no inan aman ida-idak  fila fali ba sira nia fatin. Maske inan aman sira ba, maibe ba madre no menina sira, kontinua serbisu, fase uma no haloot sasan sira, tanba ida ne’e mak ita nia tradisaun, wainhira festa/ atividade ruma ita sempre dansa ho  aisar no aimop, maibe maske kolen ami hotu enjoy no haksolok ho ami nia misaun ho foinsa’e sira iha ami nia komunidade.

(Angelita Gomes)