Venilale – Oratorio mak fatin ida karateriza ho oferta formativa ne’ebé riku ho valór umanu no sarani nian, nakonu ho atividade oioin adekuadu ba grupu otas oioin ba ambiente moris nian: Desporto, animasaun tempu  livre nian, alfabetizasaun no katekeze okazionál eh sistemátika (cf. Lome), ne’ebé bele tulun iha sira nia dezenvolvimentu umanu no espiritual nian.  Nune’e, ho motivasaun ida ne’e, ami komunidade MA (Maria Auxiliadora) hamutuk ho labarik sira, husi oratorio sentru haat (Uai-bua, Uai-haco, Lia-oli no Orfanato) hahu loke filafali oratorio ba ano lectivo 2017 nian iha loron, 19/02/2017.

Atividade lao dadaun maibé nu’udar komunidade hakarak halibur sira tanba razaun; atu hotu hamutuk bele lao iha diresaun ida deit ho vizaun pesoa umana nu’udar Maromak nia ilas, hakiak ho domin no ba domin, kontínua  buras iha Esperiensia sira  oratorio nian tulun hodi buka sentidu ba moris rasik.

Atividades hotu ne’ebé halo iha loron ne’e,  uluk nanain hahu orasaun tanba Orasaun mak ema nia dadais no tan ne’e nia haknalun buat hotu ne’ebe hola parte iha ema nia moris no Iha nia buat hotu hetan nia lian rasik. Depoizde orasaun Madre Esmeralda Soares – Diretora da casa fo liamenon ba sira nu’udar grupu, hodi dehan: “Oratorianu doben sira, Reza mak;  ksolok no esperansa nia hun, ne’ebé bele tulun ita hodi kontínua moris iha  Espiritu Don Bosco, Domingos Savio, Laura Vicuña no Madre Mazzarello sira nia ksolok, domin no sakrifisiu. Iha oratorio, ita aprende kona ba ksolok, domin no perdua malu. Ita família Maromak nian, mai ita hamutuk hakbesik ita nia-an ba Maromak, ita sei lao iha sosiedade ne’ebé onestu tanba ita hamrook kona ba buat di’ak iha ita nia fuan”.

Aleinde kona ba jogus, kada ekipa anima grupu kiik no boot halo jogus oioin, iha ikus ida ne’ebé manan hetan premiu kiik no simples ne’ebé ladun iha folin, maibe fó no simu nu’udar símbolu deit,  tanba motivasaun ba jogus ida ne’e mak buka hametin amizade entre sira.

Ikus ami remata ho merenda, fatin Salaun Parokia Sagrada coração de Jesus-Venilale.

(Agata Freitas)