Liturjia domingu ohin nian propoin mai ita reflesaun ida kona-ba ita-nia prioridade sira. Nia rekomenda atu ita dirije ita-nia matan ba buat ne’ebé importante duni no liberta ita-nia fuan husi soin materiál nia ukun. Sarani sira iha konfiansa ba Maromak ne’ebé tau matan ba nia oan sira hanesan aman ida no ho domin gratuitu no inkondisionál inan ida nian.

Evanjellu konvida ita atu buka esensiál (“Reinu”) husi buat sekundáriu barbarak nia leet ne’ebé, loroloron okupa ita-nia interese. Evanjellu mós garante ita katak hili esensiál la signifika haluha buat  selseluk; ita-nia Maromak mak aman ida nakonu ho atensaun ba nia oan sira, no tau matan ho domin ba nia oan sira nia nesesidade.

Leitura dahuluk subliña Maromak nia solisitude no domin hodi uza ilas maternidade nian: inan hadomi oan, ho domin instintivu, rohan-laek, gratuitu, inkondisionál; no Maromak nia domin mantein karakterístika sira inan nia domin ba nia oan, maibé ho grau infinitu. Tanba ne’e, ita iha serteza katak Nia nunka abandona ema sira no mantein ba nafatin aliansa ne’ebé nia halo ho Ninia Povu.

Iha leitura daruak, Paulo konvida sarani sira Corinto nian atu hateke ba esensiál, katak Maromak nia proposta salvasaun iha Jezús Kristu, no la’ós iha buat ne’ebé asesóriu (meiu sira mensajen nian).

Download