Dili – Inspetoria FMA TIN haksolok ho bainaka importante ida, irmán Alaide Deretti, konselleira jerál ba Misaun. Vizita ne’e importante iha tinan ne’ebé ita selebra prezensa FMA ba tinan 25, sai hanesan abertura ofisiál tinan selebrasaun nian. Nia hahú nia vizita husi kedas loron 10 iha Jakarta no ohin to’o iha Dili. Atu halo resesaun ba nia iha aeroportu mak labarik sira husi grupu Infância Misssionária, irmán konselleira inspetoriál, no porakazu iha mós Primeiro Ministro Xanana Gusmão, ne’ebé loloos viajen hamutuk ho irmán Alaide no irmán Paola ho Merpati.

 

Hanesan tradisaun iha Timor-Leste no mós iha uma saleziana, Bainaka superiora ida mak hanesan Na’i-Feto nia vizita rasik. Nune’e irmán sira simu hodi agradese Maromak ho Maria nia liafuan Magnificat nian.

Iha tuku neen loraik, selebrasaun eukarístika hamutuk Solenidade Axensaun nian, ne’ebé padre Manuel Fraile SDB mak prezide. Nia fó hanoin kona-ba ita-nia destinu boot hamutuk ho Jezús iha Lalehan no atu to’o iha ne’ebá uluknanai, moris Jezús nia mandatu atu haklaken Reinu, hodi foti ezemplu husi Maria na’in tolu iha Institutu: Maria Mazzarello, Maria Romero, Maria Troncatti.

Han-kalan hotu tiha, komunidade, foin-sa’e sira formasaun no serbisu-na’in sira fó benvinda ba irmán Alaide ho programa kulturál ida. Hafoin taka ho bonoite husi irmán Alaide kona-ba Madre Mazzarello nia festa ne’ebé aban ita sei selebra hamutuk, hodi hanoin fini Mornese ne’ebé mai to’o ita-nia rain no oras-ne’e fó fuan.