Iha orasaun Angelus ho sarani no peregrinu sira iha domingu 12 Fevereiru, Amu-Papa Francisco ko’alia kona-ba Jezús ne’ebé analiza aspetu difisil tolu maibe, bele realiza tomak Maromak nia vontade. Aspetu tolu ne’e mak “oho ema, adultériu no juramentu.

“Keta oho”

Kona-ba ukun-fuan “keta oho”, Jezús afirma katak ema viola ukun-fuan ne’e la’ós de’it ho omisídiu efetivu, maibé mós ho komportamentu sira ne’ebé ofende ema nia dignidade, inklui lia-fuan aat sira. Klaru –  Amu-Papa kontinua – nia la iha gravidade kulpabilidade hanesan ho asasiniu, maibékoloka iha liña hanesan, basá sira ne’e mak premisa no revela hahalok aat ne’ebé hanesan.

“Jezús konvida ita atu keta estbelese graduasaun ida ofensa sira-nian, maibé atu konsidera sira hotu nu’udar halo aat, basá nia hahú husi intensaun atu halo aat ba maluk”, Amu-Papa husu.

Adultériu

Realizasaun seluk lori ba lei kazamentu nian. Adultériu iha tempu ne’e konsidera nu’udar violasaun ida direitu propriedade mane nian hasoru feto. Jezús fali,– Papa Francisco destaka – ba iha aat nia abut. Hanesan ema to’o iha omisídiu liuhusi injúria no ofensa sira, bele to’o mós adultériu ho intensaun sira possui nian iha relasaun ho feto ne’ebé la’ós feen rasik.

“Adultériu, hanesan mós na’ok, korrupsaun no salan sira seluk, hahú atu hanoin iha ita-nia íntimu no, bainhira realiza ona hilin ne’ebé laloos, sira manán forma iha komportamentu konkretu”, Amu-Papa hatudu.

Juramentu, sinál inseguransa nian

Jezús mós dehan tan ba ninia eskolante sira atu keta jura, tanba juramentu mak sinál inseguransa no duplisidade nian iha lala’ok relasaun uman sira, Amu-Papa hateten.

“Ema instrumentaliza Maromak nia autoridade atu fó garantia ba ita-nia sasán umana sira. Maibé ita simu bolun atu harii entre ita, iha ita-nia família no ita-nia komunidade sira klima ida klareza no konfiansa resíproka, atu sai sinseru lahodi buka intervensaun husi superiór sira atu bele sai kredivel. Deskonfiansa no suspeita resíproka nafatin ameasa hakmatek!”, Papa Francisco remata.