RV – Iha orasaun Angelus iha Prasa S. Pedro (05/02), Amu-Papa ko’alia ba sarani sira kona-ba metáfora eh ilas masin no roman ne’ebé Mateus nia Evanjellu propoin iha DOmingu V Tempu Komún.

“Jezús nia liafuan sira dirije ba eskolante sira tempu hotu nian, tanba ne’e mai “ita” mós”, Papa Francisco komenta. Nia konvida ita atu sai lalenok ninia roman nian, liuhusi sasin hahalok di’ak nian. Defaktu, liuhusi ita-nia komportamentu mak – iha di’ak no iha aat – husik sinál iha ema seluk. Naroman fiar nian la’ós ita-nia propriedade, maibé ita simu bolun atu halo nia nabilan iha mundu liuhusi hahalok di’ak sira, la’ós liafuan sira. “No mundu nia nesesidade boot tebes ba roman Evanjellu nian ne’ebé transforma, kura no garante salvasaun ba ema ne’ebé simu nia!”, Amu-Papa afirma.

Masin mak elementu ida ne’ebé, enkuantu fó sabór, nia prezerva hahán husi alterasaun no deteriorasaun – “iha Jezús nia époka la iha jeleira!”, Papa Francisco halimar.

Tanba ne’e, sarani sira nia misaun iha sosiedade mak fó “sabór” ba moris ho fiar no domin ne’ebé Kristu haraik mai ita no, tempu hanesan, “mantein dook mikróbiu poluidór sira egoízmu niann, inveja nian, ko’alia aat nian no seluk tan. Mikróbiu sira ne’e hadodok ita-nia komunidade nia moris, ne’ebé iha kontráriu tenke nabilan nu’udar fatin sira akollimentu nian, solidariedade nian no rekonsiliasaun nian “.

Atu realiza misaun ida-ne’e, nia hatutan, ” presiza atu ita uluknanai sai livre husi dejenerasaun korruptora influénsia mundane nian, kontrária ba Kristu no Evanjellu; no purifikasaun ida-ne’e nunka remata, tenke halo nafatin. Tenke halo loron-loron!”.

Amu-Papa remata: “Ita ida-idak simu bolun atu sai roman no masin iha ambiente rasik moris loroloron nian. Atu ita-nia Inan tulun ita atu husik Na’i purifika no leno ita nafatin, atu ita sai ‘masin rai nian’ no ‘roman mundu”.