Ha’u nia foin-sa’e doben sira, imi hasoru malu ona ho Jezús, Na’i nia matan?

Reitór nia mensajen ba foin-sa’e sira iha Don Bosco nia festa (31 Janeiru 2017).

Ha’u-nia foin-sa’e doben mundu salezianu tomak nian, foin-sa’e mane doben sira no foin-sa’e doben feto sira,

simu bá ha’u-nia kumprimentus belun, maun no aman nian; ha’u dirije ba imi hodi Don Bosco nia naran, enkuantu ha’u to’o ba imi ‘hodi dere imi-nia moris nia odamatan:” iha okaziaun ita-nia Aman Doben nia festa.

Loron ruma liubá Papa Francisco hakerek surat id aba foin-sa’e sira iha okaziaun aprezentasaun dokumentu nian, ne’ebé sei serve atu prepara Asembleia Jerál Ordinária XV Sínodu Bispu sira-nian, ne’ebé sei selebra iha fulan Outubru tinan 2018. Iha inísiu surat nian Amu-Papa dehan ba imi katak “nia hakarak atu imi sai sentru atensaun nian tanba nia lori imi iha fuan laran”. Ha’u hatene didi’ak, liuhusi esperiénsia pesoál, katak sá dehan lori imi iha fuan laran no hakarak di’ak hotu ba imi, maski iha kazu barak ita la iha posibilidade atu kumprimenta malu pesoalmente.

Ha’u bele konfia ba imi buat ruma? Dalabarak, bainhira ha’u hasoru ho imi foin-sa’e sira husi parte oioin mundu nian no tenke dirije liafuan ba imi, ha’u hanoin kona-ba saida mak Don Bosco sei dehan ba imi hodi Jezús nia naran.

Ha’u konxiente kona-ba diversidade boot ne’ebé iha entre imi tuir nasaun no kontinente sira iha-ne’ebé imi moris bá; diversidade mós bazeia ba kultura, diversidade tuir tipu preparasaun nian ba vida, balun ho estudu formasaun profisionál nian eh kualifikasaun ba serbisu, balun liuhusi estudu universitáriu sira. Ha’u konxiente katak lahanesan situasaun husi sira ne’ebé iha rekursu umanu no ekonómiku sira atu dezenvolve talent rasik, husi kondisaun sira ne’ebé menus iha oportunidade , nst. Maibé ha’u konvensidu katak imi-nia fuan foin-sa’e iha buat barak iha komún, ne’ebé to’o ba imi iha-ne’ebé imi horik bá.

Mensajen ne’ebé ohin ha’u haruka ba imi iha sintonia tomak ho buat ne’ebé Papa Francisco husu ba imi iha okaziaun oioin: “Foin-sa’e doben sira, ha’u iha konfiansa tomak iha imi no ha’u harohan ba imi. Imi iha korajen atu bá kontra korrente”.

Iha adultu barak ne’ebé iha konfiansa tomak iha imi. Ha’u mak sira ne’e ida, ha’u-nia foin-sa’e doben sira, no ha’u konvida imi atu sai ema aten-brani iha imi-nia moris. Ha’u husu imi stu ih aforsa atu bá “kontra korrente” bainhiranalian ho insisténsia iha imi-nia fuan nia laran bolun atu sai fiél ba an rasik no ba Jezús.

Ohin mundu presiza imi. Presiza ideal boboot sira ne’ebé própriu imi-nia juventude nian no imi-nia mehi juveníl nian. Ohin loron liufali uluk, mundu presiza foin-sa’e sira nakonu ho esperansa no aten-brani, ne’ebé la ta’uk atu moris, atu mehi, atu buka ksolok auténtiku no kle’an ne’ebé liuhusi nia Maromak horik iha imi-nia fuan. Foin-sa’e sira ne’ebé sente hakaran atu empeña an no iha kapasidade atu kompromete an no hadomi “to’o terus:, hanesan Madre Teresa de Calcutta hateten, ohin loron santa. Foin-sa’e sira ne’ebé, tan empeñu iha kapasidade atu saran sira-nia tempu no saran mós sira-nia an rasik.

Maibé iha mós foin-sa’e barak ne’ebé “kolen, baruk eh iha deziluzaun”, eh foin-sa’e sira ne’ebé nunka iha entuziazmu ba buat ida, foin-sa’e fraku sira no frajil. Foin-sa’e sira ne’’e presiza foin-sa’e sira seluk , presiza imi, ne’ebé ko’alia kona-ba esperiénsia no ho linguajen ida mai husi moris, hodi halo sira haree katak iha dalan seluk no posibilidade seluk. Foin-sa’e sira ne’ebé tulun aira atu komprende loloos katak halai husi dezafiu sira moris nian la’ós solusaun; foin-sa’e sira ne’ebé nu’udar dixípulu-misionáriu loloos, tulun sira deskobre Jezús iha sira-nia ezisténsia no fiar iha Nia. Jezús ida ne’ebé, naturalmente, “la fa’an iluzaun ba ó”, maibé oferese Vida, ida auténtika, ida ninian; oferese nia An rasik.

Ha’u hanoin, ha’u-nia doben foin-sa’e sira katak iha 31 Janeiru 2017 Don Bosco bele dehan buat rum aba imi, ho liafuan no linguajen ohin nian, hanesan Amu-Papa dehan ba imi iha ninia surat: “Keta ta’uk… Mundu ida di’ak liu harii hodi imi mós, hodi imi nia hakaran ba mudansa no imi-nia laran-luak. Keta ta’uk atu rina Espíritu ne’ebé sujere hilin barani nian, no keta demora bainhira konxiénsia husu imi atu tuir Mestre”.

Ha’u hakarak ho fuan tomak atu sai duni nune’e ba imi: katak imi iha kapasidade atu assume risku sira bainhira liga ho Jezús no Aman Maromak iha ita-nia moris. Niia Prezensa sei la kuran iha imi liuhusi Espíritu no sei sai garantia segura ba ili-nia dalan umanu ksolok nian.

Ha’u kumprimenta imi ho afetu sinseru no ha’u halo votus festa ksolok Don Bosco nian no ita-nia Inan doben Ausiliadora nia protesaun nu’udar

Ángel Fernández Artime,

Reitór-Mor