Redasaun / RV – Iha loron 13 Janeiru, Sekretáriu Jerál Sínodu Bispu sira nian, Kard. Lorenzo Baldisseri,  iha ‘Sala Stampa Vaticana’, aprezenta Dokumentu Preparatóriu ba Sínodu Bispu sira-nian ba jornalista sira. Sínodu ho tema “Foin-sa’e sira, fiar no dixernimentu vokasionál”. Sínodu ne’e iha finalidade atu identifika modalidade sira ne’ebé di’ak liu atu akompaña foin-sa’e sira, atu rekoñese no hakohak bolun ba moris nakonu no atu haklaken Evanjellu ba sira ho modu efikás. Dokumentu ne’e fó inísiu ba faze konsultasaun nian ba Maromak nia Povu tomak: dokumentu dirije ba Konferénsia Episkopál sira, Konsellu Jerárkiku Kreda Orientál sira, ba ‘dicasteri’ sira Kúria Romana nian no ba ‘Unione dei Superiori Generali’. Ba foin-sa’e sira sei halo konsultasaun liuhusi Internet.

Tuir Kard. Lorenzo Baldisseri, dokumentu preparátoriu nia finalidade mak atu halibur informasaun sira kona-ba kondisaun atuál foin-sa’e husi tinan 16-29, sira-nia kondisaun sósiu-kulturál, iha kontestu oion sira moris bá, atu bele komprende no halo pasu sira tuirmai iha preparasaun ba Asembleia Bispu sira-nian. Testu ne’e fahe ba parte tolu: dahuluk kona-ba rona realidade, daruak fó hanoin kona-ba importánsia dixernimentu nian, datoluk foka kona-ba asaun pastorál iha komunidade ekleziál. Kreda hakarak akompaña foin-sa’e sira atu deskobre no realiza sira-nia vokasaun.

Liafuan ‘vokasaun’ tuir Kard. Lorenzo, presiza komprende iha ninia sentidu luan no refere ba posibilidade luan realizasaun konkreta moris rasik nian iha ksolok domin nian no iha plenitude mai husi saran an ba Maromak no ba ema seluk. Ne’e katak hetan forma konkreta iha-ne’ebé realizasaun nakonu ne’e bele akontese “liuhusi hilin oioin ne’ebé artikula estadu moris nian, matrimóniu, ministériu ordenadu, vida konsagrada, nst…, profisaun, modalidade empeñu sosiál no polítiku, estilu moris nian, jestaun tempu no osan nian, nst”.

Atu kompleta dokumentu ne’e iha kuestionáriu ida atu halibur dadus estatístiku sira kona-ba kreda lokál ida-idak, resposta ba pergunta oioin atu lee di’ak liután situasaun ida-idak no ikusmai partilla kona-ba prátika di’ak sira ne’ebé hala’o ona atu bele tulun Kreda tomak. Maibé, iha faze ida-ne’e foin-sa’e sira mós halo parte ativa liuhusi internet ne’ebé prepara atu rekolle sira-nia espetativa no sira-nia moris. Mons. Fabio Fabene, Sub-Sekretáriu Sínodu Bispu sira-nia mak ko’alia hodi esplika motivu ba hilin ida-ne’e:

“Sínodu tuirmai lakohi interroga de’it kona-ba oinsá akompaña foin-sa’e sira iha dixernimentu kona-ba sira-nia hilin moris nian iha Evanjellu nia roman, maibé hakarak mós rona foin-sa’e sira-nia hakaran sira, projetu sira, mehi sira ba sira-nia moris, nune’e mós difikuldade sira ne’ebé sira hasoru atu realiza sira-nia projetu ba servisu sosiedade nian, iha-ne’ebé husu atu sira sai protagonista ativa”.

Atu envolve foin-sa’e sira sei tau iha ajenda inisiativa seluk lubuk ida, velada orasaun nian, enkontru internasionál sira, konsertu sira. Resposta sira ba Dokumentu Preparatóriu ninia kuestionáriu no foin-sa’e sira-nia resposta mak sei sai baze ba redasaun Dokumentu serbisu nian eh ‘Instrumentum laboris’, ne’ebé sai pontu referénsia nian ba Padre Snodál sira nia diskusaun.