Maromak nia Liafuan konvida ita atu reflete kona-ba kompromisu kristaun. Reinu Maromak nian interpela sarani sira atu keta moris hakmatek iha komodizmu nune’e mós atu keta subar an iha relijiaun rituál halo ho jestu mamuk sira; maibé sira tenke moris ho forma kompremetida ba mundu nia transformasaun no sai naroman ne’ebé nabilan iha nakukun mundu nian.

Iha Evanjellu, Jezús husu/ezorta ninia eskolante sira atu keta hela iha mediokridade, iha komodizmu, iha “husik de’it”; Jezús husu sira atu sai masin ne’ebé fó sabór ba mundu no fó sasin kona-ba Maromak nia projetu salvasaun nian; Nia mós husu eskolante sira atu sai naroman ne’ebé hatudu signifikadu moris rohan-laek,  ne’ebé manán nakukun terus nian, egoízmu, ta’uk ne’ebé lori ba enkontru ho “Reinu” liberdade no esperansa nian.

Primeira leitura aprezenta kondisaun ne’ebé presiza atu “sai naroman”: “naroman” ida ne’ebé leno mundu, la’ós ida-ne’ebé kumpre ritu relijiozu sira ne’ebé la fó fuan no mamuk hela, maibé ida ne’ebé kompromete an loloos ho justisa, dame, ho partilla, ho fraternidade. Relijiaun loos la tau fundamentu iha liafuan mamuk, maibé iha kompromisu konkretu ne’ebé lori ema atu sai sinál Maromak nia domin nian iha maun-alin sira nia leet.

Segunda leitura fó hanoin katak sai “naroman” signifika identifika an ho Kristu no interioriza moris “krús” nian nu’udar don moris nian. Iha frajilidade no frakeza mak Maromak hatudu An: Paulo nu’udar ema fraku sai ezemplu kona-ba ne’e.

Download