Sidade Vaticano – Papa Francisco afirma ohin iha Vaticano katak vida espirituál mak resposta ba anseiu umanidade nian no katak Espíritu Santu revela Maromak nu;udar Aman ba ema ida-idak.

“Ita husik Espíritu Santu gia ita, ita husik atu Nia ko’alia ba ita-nia fuan nu’udar aman loloos”, Papa afirma, iha katekeze audiénsia semanál nian ne’ebé ohin halo iha Prasa S. Pedro, iha ema rihun ba rihun nia oin.

Francisco friza katak “ema tempu hotu nian no fatin hotu nian: iha hakaran ba “moris nakonu no furak, justu no di’ak” ne’ebé la “hetan ameasa husi mate”, maibé bele “sai tasak no buras”.

[Asesu kópia ho lia-portugés]

 

“Ema hanesan la’o-rai ida ne’ebé, hakat rai-fuik maran sira vida nian, hamrook ba bee moris ida, suli maka’as no fresku, ho kbiit atu halakon ho profundidade ema nia hakaran kle’an ba naroman, domin, fafurak no dame” nia hatutan tan.

Tuir Amu-Papa, “bee moris” ne’e mak Espíritu Santu, “Kristu moris hi’as nia don boot” no “bee-matan ne’ebé la maran Maromak nia moris nian” iha sarani ida-idak nia laran, ne’ebé tenke sai “ema ida ne’ebé hanoin no halo tuir Maromak, tuir Espíritu Santu”.

“Espíritu Santu lori mai ita-nia fuan Maromak nia moris rasik, moris ida oan loos nian, iha relasionamentu halo ho konfidénsia, liberdade no konfiansa iha Aman nia domin ne’ebé sadia, ne’ebé fó mai ita mós matan foun atu hateke ba ema seluk, hodi halo ita haree iha ita-nia maun-alin no biin-alin sira ne’ebé ita tenke respeita no hadomi”,Amu-Papa destaka iha ninia katekeze ohin.

Papa Francisco mós repete tema iha nia pájina iha rede sosiál Twitter, ho tuir-na’in sira liu millaun neen: “Jezús dehan: Ha’u mai atu sira hetan moris, no hetan moris ne’ebé naresin. Ne’e mak rikusoin loos; la’ós ida materiál!”.

Durante audiésia, Amu-Papa temi festa litúrjika Na’i-Feto Luján, “patrona Argentina nian”, hodi hatudu nia afetu ma ninia kompatriota sira. EMa lubun sira hatán ho basa liman maka’as no halo Amu-Papa husu sira atu basa liman liután ba Na’i-Feto.

Iha finál enkontru nian, Amu-Papa, halo sínteze tan  ho improvizu (la lee iha surat-tahan): “Ita tenke rona Espíritu Santu ne’ebé iha ita-nia laran, ron aNia. No Nia dehan sá mai ita? Katak Maromak di’ak, Maromak mak Aman, Maromak hadomi ita, katak Maromak perdua ita nafatin. Mai ita rona Espíritu Santu”, ne’e mak nia liafuan ikus iha audiénsia.